ശബരിമല നമുക്ക് ഒരു തീർത്ഥാടന കേന്ദ്രം മാത്രമല്ല. വ്രതമെടുത്ത് അയ്യപ്പദർശനത്തിനും മകരവിളക്ക് ദർശനത്തിനുമെത്തുന്നത് ഹൈന്ദവ വിശ്വാസികൾ മാത്രവുമല്ല. മാലയിട്ടും കറുത്ത മുണ്ടുടുത്തും കല്ലും മുള്ളും നിറഞ്ഞ കാനനപാത ചവിട്ടി ശ്രീധർമ്മശാസ്താവിന്റെ ശരണപാദം തേടിയെത്തുന്ന സ്വാമിഭക്തർ പങ്കുവയ്ക്കുന്ന മതേതര ദർശനത്തിന്റെ സൗന്ദര്യം കൂടിയുണ്ട്,​ അതിൽ. മണ്ഡല- മകരവിളക്ക് സീസൺ ആണ് ശബരിമല തീർത്ഥാടകരുടെ തിരക്കേറിയ സമയമെന്ന്,​ സ്വാമിമാർക്ക് സുരക്ഷിതവും സൗകര്യപൂർണവുമായ ദർശനമൊരുക്കാൻ ഉത്തരവാദിത്വമുള്ള ദേവസ്വം ബോർഡിനും പൊലീസിനും സർക്കാരിനും നന്നായി അറിയാം. പക്ഷേ,​ കഴിഞ്ഞ രണ്ടുദിവസങ്ങളിലായി,​ ദർശനപുണ്യത്തിന് ശബരിമല തീർത്ഥാടകർ നേരിടേണ്ടിവരുന്ന നകരയാതനകൾ കേട്ടാൽ തോന്നുക,​ ഈ തിരക്ക് അഭൂതപൂർവമെന്നോ അപ്രതീക്ഷിതമെന്നോ ആണ്!

സന്നിധാനത്തേക്കു നീളുന്ന ക്യൂവിൽ പതിനെട്ടും ഇരുപതും മണിക്കൂറുകൾ ദാഹജലത്തിനോ,​ പ്രാഥമിക കൃത്യങ്ങൾക്കു പോലുമോ സൗകര്യമില്ലാതെ കാത്തുനിൽക്കേണ്ടിവരുന്ന അനുഭവത്തെ നരകതുല്യമെന്നേ വിശേഷിപ്പിക്കാനാകൂ. കൊച്ചുകുഞ്ഞുങ്ങളുമായി എത്തുന്നവരും,​ പ്രായംചെന്നവരും നേരിടേണ്ടിവരുന്ന ദുരിതയാതനകളെക്കുറിച്ച് എന്തു പറയും?​ ഇക്കഴിഞ്ഞ ‌ഞായറാഴ്ച മാത്രം ദർശനത്തിന് ബുക്ക് ചെയ്തിരുന്ന തീർത്ഥാടകരുടെ എണ്ണം ഒരുലക്ഷത്തിലധികമാണ്. ഇന്നലെ 90,​000. പ്രത്യേക വിശേഷദിവസങ്ങളായിരുന്നില്ല ഇതൊന്നും. കു‌ഞ്ഞുങ്ങളുമായെത്തുന്നവർക്കും വയോധികർക്കും പ്രത്യേക ക്യൂ ഏർപ്പെടുത്തണമെന്ന് ഹൈക്കോടതി നിർദ്ദേശിച്ചിരുന്നതാണ്. ശബരിമലയിലെ തിരക്ക് സംബന്ധിച്ച ഹ‌ർജി കേൾക്കവേ,​ സുരക്ഷിത ദർശനത്തിന് സൗകര്യമൊരുക്കണമെന്ന് ബഹുമാനപ്പെട്ട കോടതി ഇന്നലെയും ആവർത്തിച്ചു.

കോടതി പറഞ്ഞിട്ടു വേണോ,​ ദർശനത്തിനെത്തുന്ന ഭക്തർക്ക് സൗകര്യമൊരുക്കണമെന്ന് അധികൃതർക്കു ബോധോദയമുണ്ടായാകാൻ! എന്നിട്ടും,​ ഞായറാഴ്ചത്തെ നിയന്ത്രണാതീതമായ തിരക്ക് മാദ്ധ്യമങ്ങളിലെല്ലാം വാർത്തയായിട്ടും,​ ദർശന സമയം ഒരുമണിക്കൂർ കൂട്ടിയതല്ലാതെ എന്തെങ്കിലും അധികസൗകര്യം ഏർപ്പെടുത്താൻ ദേവസ്വം ബോർഡോ സംസ്ഥാന സർക്കാരോ മനസ്സുവച്ചതായി ഒരുലക്ഷണവും കണ്ടില്ല. അതിനു പകരം,​ പാളിച്ച സംഭവിച്ചത് ദേവസ്വം ബോർഡിനോ പൊലീസിനോ എന്ന തർക്കത്തിനായിരുന്നു തിരക്ക്! ശബരിമല തീർത്ഥാടകരിൽ ഏറിയപങ്കും ഇതരസംസ്ഥാനങ്ങളിൽ നിന്നെത്തുന്നവരാണ്. അതിർത്തി കടക്കുമ്പോൾ മുതൽ അവർ സംസ്ഥാനത്തിന്റെ അതിഥികളാണ്. അതിഥികളെ ദേവന്മാരായി പരിഗണിക്കുന്നതാണ് നമ്മുടെ പാരമ്പര്യം. അത്തരം എന്തെങ്കിലും പരിഗണന ശബരിമല തീർത്ഥാടകരുടെ കാര്യത്തിലുണ്ടോ?​

വരുമാനത്തിന്റെ കാര്യത്തിലാകട്ടെ,​ കേരളത്തിലെ മറ്റേതെങ്കിലും ആരാധനാലയത്തിലെത്തുന്നതിന്റെ എത്രയോ ഇരട്ടിയാണ് ശബരിമലയിലെ വരവ്. കഴിഞ്ഞ മണ്ഡല- മകരവിളക്കു സീസണിലെ മാത്രം വരുമാനം ഏകദേശം 351 കോടിയിലധികമായിരുന്നു. ദർശനം നടത്തിയത് മൂന്നുകോടിയിലേറെ ഭക്തർ. ഇത്തവണ മണ്ഡലപൂജയ്ക്ക് നടതുറന്നിട്ട് 25 ദിവസം പിന്നിട്ടതേയുള്ളൂ. മകരവിളക്കിന് ഇനിയുമുണ്ട്,​ ഒരുമാസത്തിലധികം സമയം. തീർത്ഥാടന ടൂറിസം പ്രോത്സാഹിപ്പിക്കുന്ന സർക്കാർ സംസ്ഥാനത്തെ ഏറ്റവും വലിയ തീർത്ഥാടന കേന്ദ്രത്തിൽ ഏർപ്പെടുത്തുന്ന സൗകര്യങ്ങളുടെ അപര്യാപ്തത വെളിപ്പെടുത്തുന്നതാണ് കഴിഞ്ഞ ദിവസത്തെ നരകക്കാഴ്ചകൾ.

ഇന്നലെ ശബരിലമയിലെ തിരക്കുമായി ബന്ധപ്പെട്ട ഹ‌ർജി പരിഗണിച്ചപ്പോൾ ഹൈക്കോടതിയിൽ സർക്കാർ അറിയിച്ചത്,​ എല്ലാം നിയന്ത്രണവിധേയമാണെന്നാണ്! ഇന്ന് ഹർജി വീണ്ടും പരിഗണിക്കുന്നുണ്ട്. കോടതി വടിയെടുത്താലേ ദേവസ്വവും സർക്കാരും അനങ്ങൂ എന്നുവരുന്നത് സങ്കടകരമാണ്. ദിനംപ്രതി വർദ്ധിക്കുന്ന തീർത്ഥാടകത്തിരക്ക് നിയന്ത്രണ വിധേയമാക്കാനും,​ ദർശനത്തിന് വേണ്ടിവരുന്ന അതിദീർഘമായ കാത്തുനിൽപ് പരമാവധി കുറയ്ക്കാനും അടിയന്തരമായി ആലോചിച്ച് ക്രിയാത്മക പദ്ധതി നടപ്പാക്കിയില്ലെങ്കിൽ മകരവിളക്ക് അടുക്കുമ്പോഴേക്കും സ്ഥിതി പ്രവചനാതീതമാകും. ഇതിനുള്ള വിവേകം ദേവസ്വം ബോർഡിന്റെ ഭാഗത്തുനിന്നും സർക്കാരിന്റെ ഭാഗത്തു നിന്നും എത്രയും വേഗം ഉണ്ടാകണം.