മുഖസൗന്ദര്യത്തിൽ പ്രധാന പങ്ക് വഹിക്കുന്ന ഒന്നാണ് പുരികങ്ങൾ. എത്ര സമയമെടുത്ത് ഒരുങ്ങിയാലും പുരികം കട്ടിയില്ലെങ്കിൽ എന്തോ ഒരു കുറവുള്ളതുപോലെ മിക്കവരുടെയും മുഖത്ത് തോന്നിക്കാറുണ്ട്. പുരികത്തിന് കട്ടി തോന്നിക്കാനായി ഐബ്രോ പെൻസിൽ, ഐബ്രോ ജെൽ തുടങ്ങിയ വസ്തുക്കൾ ഉപയോഗിക്കുന്നവരും ധാരാളമുണ്ട്. എന്നാൽ, ഇത്തരത്തിലുള്ള സാധനങ്ങൾ ശരിയായി ഉപയോഗിച്ചില്ലെങ്കിൽ വിചാരിക്കുന്ന ഫലം കിട്ടില്ല. ഈ മാർഗങ്ങളൊന്നുമില്ലാതെ പുരികം എങ്ങനെ നാച്വറലായി ഭംഗിയുള്ളതും കട്ടിയുള്ളതുമാക്കാം എന്നതിനെ പറ്റിയാണ് ഇനി പറയാൻ പോകുന്നത്. ഇത് ശരിയായി ചെയ്ത് കഴിഞ്ഞാൽ നിങ്ങൾക്ക് പുരികം ത്രെഡ് ചെയ്യേണ്ട ആവശ്യം പോലും വരുന്നില്ല. ഇത് ചെയ്യേണ്ടത് എങ്ങനെയെന്ന് നോക്കാം.

ആവശ്യമായ സാധനങ്ങൾ

ബദാം - 4 എണ്ണം

ലാവന്റ‌ർ ഓയിൽ - 4 തുള്ളി

കറ്റാർവാഴ ജെൽ - 1 ടീസ്‌പൂൺ

ആവണക്കെണ്ണ - 2 ടീസ്‌പൂൺ

വെളിച്ചെണ്ണ - 1 ടീസ്‌പൂൺ

വാസ്‌ലിൻ - 1 ടീസ്‌പൂൺ

വൈറ്റമിൻ ഇ കാപ്‌സ്യൂൾ -1

തയ്യാറാക്കുന്ന വിധം

ബദാം നന്നായി ചൂടാക്കി കരിച്ചെടുക്കണം. തണുക്കുമ്പോൾ പൊടിച്ചെടുക്കുക. ഇതിലേയ്‌ക്ക് ലാവന്റ‌ർ ഓയിൽ, കറ്റാർവാഴ ജെൽ, ആവണക്കെണ്ണ, വെളിച്ചെണ്ണ, വാസ്‌ലിൻ, വൈറ്റമിൻ ഇ കാപ്‌സ്യൂൾ എന്നിവ ചേർത്ത് നന്നായി യോജിപ്പിക്കുക. ഈ സിറം ഒരു ഗ്ലാസ് ബോട്ടിലിൽ അടച്ച് സൂക്ഷിക്കാവുന്നതാണ്.

ഉപയോഗിക്കേണ്ട വിധം

രാത്രി ഉറങ്ങുന്നതിന് മുമ്പ് ഈ സിറം പുരികത്തും കൺപീലിയിലും പുരട്ടാവുന്നതാണ്. രാവിലെ കഴുകി കളഞ്ഞാൽ മതി. ഒറ്റ ഉപയോഗത്തിൽ തന്നെ പുരികം നല്ല കറുപ്പ് നിറമാകുന്നത് നിങ്ങൾക്ക് കാണാം. മൂന്ന് മാസം തുടർച്ചയായി ഉപയോഗിച്ചാൽ നല്ല കറുത്ത് കട്ടിയുള്ള പുരികം നിങ്ങൾക്ക് ലഭിക്കുന്നതാണ്.