ഒട്ടാവ: ബോഡി ഷെയിമിംഗ് നടത്തിയ ആൾക്ക് ചാനലിലൂടെ ലൈവായി മറുപടി നൽകിയതിലൂടെ കയ്യടി നേടി വാർത്താ അവതാരക. കനേഡിയൻ വാർത്താ അവതാരക ലെസ്ലി ഹോർട്ടൺ ആണ് അധിക്ഷേപിച്ചയാൾക്ക് ചുട്ടമറുപടി നൽകിയത്. ഗ്ലോബൽ ന്യൂസ് എന്ന ചാനലിൽ മോർണിംഗ് ഷോയിൽ പതിവുപോലെ ട്രാഫിക് ന്യൂസ് സെഗ്‌മെന്റിനിടെയായിരുന്നു സംഭവം. ഇ- മെയിലിലൂടെ 'ഗർഭിണിയായതിന് അഭിനന്ദനങ്ങൾ" എന്നുപറഞ്ഞ് തന്റെ രൂപത്തെ അധിക്ഷേപിച്ചയാളെ കുറിച്ചാണ് ലെസ്ലി പറഞ്ഞത്.

വാർത്താ അവതരണത്തിനിടെ തനിക്ക് ലഭിച്ച ഒരു ഇമെയിലിനെ കുറിച്ചാണ് ഇനി സംസാരിക്കാനുള്ളതെന്ന് വ്യക്തമാക്കിയ ലെസ്ലി അധിക്ഷേപം നിറഞ്ഞ ഇ- മെയിൽ വായിക്കുകയായിരുന്നു. നന്ദിയെന്നായിരുന്നു ഇ- മെയിലിനോടുള്ള ലെസ്ലിയുടെ ആദ്യ പ്രതികരണം. താൻ ഗർഭിണിയല്ലെന്നും കഴിഞ്ഞ വർഷം കാൻസർ ബാധിച്ചതോടെ തന്റെ ഗർഭപാത്രം നഷ്ടപ്പെട്ടെന്നും അവർ പറഞ്ഞു.

തന്റെ പ്രായത്തിലുള്ള സ്ത്രീകളുടെ രൂപം ഇങ്ങനെയാണ്. നിങ്ങൾക്കത് അരോചകമാണെങ്കിൽ, അത് നിർഭാഗ്യകരമാണ്. നിങ്ങൾ അയയ്ക്കുന്ന ഇ- മെയിലുകളെക്കുറിച്ച് ചിന്തിക്കുകയെന്നു പറഞ്ഞാണ് ലെസ്ലി അവസാനിപ്പിച്ചത്. ബോഡി ഷെയ്മിംഗിനോട് പ്രതികരിച്ച ലെസ്ലിക്ക് സോഷ്യൽ മീഡിയയിൽ അഭിനന്ദന പ്രവാഹമാണ്. 'നിങ്ങൾ കാൻസർ പോരാളിയാണ്. എല്ലായിടത്തും സ്ത്രീകൾക്കായി പൊരുതുന്നു. നിങ്ങളീ ചെയ്യുന്നത് തുടരുക!"- എന്ന് കനേഡിയൻ കാൻസർ സൊസൈറ്റി പ്രതികരിച്ചു.