കോട്ട​യം: മദ്ധ്യവയസ്​കയുടെ വീട്ടിൽ നിന്നും സ്വർണം മോ​ഷ്ടിച്ച മൂ​ന്നുപേർ അ​റ​സ്റ്റിൽ. എറണാകുളം മരട് ആനക്കാ​ട്ടിൽ ആഷിക് (തക്കു,31), ഇയാളുടെ ഭാര്യ നേഹാ രവി (35), ആലപ്പുഴ അരൂർ ഉള്ളാറ​ക്കളം അർജുൻ (22) എന്നിവരെയാണ് കോട്ടയം വെ​സ്റ്റ് പൊലീസ് അറസ്റ്റ് ചെയ്ത​ത്. അയ്മനം സ്വദേശിനിയായ വീട്ടമ്മയുടെ വീട്ടിൽ നിന്നും സ്വർണ്ണമാല കവരുകയായിരുന്നു.

വീട്ടുജോലി ചെയ്ത വകയിൽ ആഷിക്കും നേഹയും വീട്ടമ്മയ്ക്ക് പണം നൽകാനുണ്ട്. കയ്യിൽ പണമില്ലാത്തതിനാൽ വീട്ടിലിരി​ക്കുന്ന ടി.വി തരാമെന്നും, ശമ്പള കുടിശ്ശിക കുറച്ച്, ബാക്കി തനിക്ക് 8000 രൂപ തന്നാൽ മ​തിയെന്ന് ആഷിക് പറയുകയും ചെയ്‌തു. ഇതിന് വീട്ടമ്മ സമ്മതിക്കുകയുമായിരുന്നു.

ടി.വി ഫിറ്റ് ചെയ്യുന്നതിനായി ഇയാളും, ഭാര്യയും, സുഹൃത്തായ അർജുനും വീട്ടമ്മയുടെ വീട്ടിൽ എത്തുകയും, ഇതിനുശേഷം വീട്ടമ്മയുടെ മുറിയിൽ സൂക്ഷിച്ചിരുന്ന രണ്ടു പവൻ തൂക്കം വരുന്ന സ്വർണ്ണമാല മോഷ്ടിച്ചുകൊണ്ട് കടന്നുകളയുകയായിരുന്നു. വീ​ട്ട​മ്മ നൽകിയ പരാതിയെ തുടർ​ന്ന് പൊലീ​സ് കേ​സെ​ടുത്തു.

ഒളിവിൽ കഴിഞ്ഞു വന്നിരുന്ന ആ​ഷി​കി​നെയും ഭാര്യയെയും പഴനിയിൽ നിന്നും, അർജുനെ എറണാകുളത്തുനിന്നും പിടി​കൂ​ടി. എസ്.എച്ച്.ഒ പ്രശാന്ത് കു​മാർ അ​റ​സ്റ്റി​ന് നേ​തൃത്വം നൽകി. ആ​ഷി​കിന് കളമശ്ശേരി, കോട്ടയം വെസ്റ്റ്, മൂവാറ്റുപുഴ എന്നീ സ്റ്റേഷനുകളിൽ ക്രിമിനൽ കേസ് നിലവിലുണ്ട്. കോടതിയിൽ ഹാജരാക്കിയ ഇവരെ റി​മാൻഡ് ചെയ്തു.