കൊച്ചി: പാരിസ്ഥിതിക സുസ്ഥിര മേഖലകളിലെ സേവനങ്ങൾ മുൻ നിറുത്തി ഫെഡറൽ ബാങ്കിന് രാജ്യാന്തര അംഗീകാരം. പരിസ്ഥിതി സൗഹൃദ പ്രവർത്തനങ്ങൾ കാഴ്ചവയ്ക്കുന്ന ധനകാര്യ സ്ഥാപനങ്ങൾക്ക് ലോക ബാങ്ക് ഗ്രൂപ്പിന്റെ ഇന്റർനാഷനൽ ഫിനാൻസ് കോർപ്പറേഷൻ (ഐ.എഫ്.സി) നൽകുന്ന പുരസ്‌കാരമാണ് ലഭിച്ചത്. ആഗോളതലത്തിൽ 258 ധനകാര്യ സ്ഥാപനങ്ങളെ പിന്തള്ളിയാണ് ഫെഡറൽ ബാങ്ക് ഒന്നാമതെത്തിയത്.
സുസ്ഥിരവും പരിസ്ഥിതി സൗഹൃദവുമായ മേഖലകളിൽ നൽകിയ വായ്പാതുക, ഹരിതഗൃഹ വാതകങ്ങളുടെ ലഘൂകരണം എന്നീ വിഭാഗങ്ങളിലാണ് മികച്ച പ്രകടനം കാഴ്ചവെച്ചത്.
പാരിസ്ഥിതിക മേഖലയിലെ ലക്ഷ്യങ്ങൾ കൈവരിച്ചതുമായി ബന്ധപ്പെട്ടതുൾപ്പെടെയുള്ള നാല് വിഭാഗങ്ങളിലെ പ്രകടനത്തിന് സൗത്ത് ഏഷ്യൻ മേഖലയിലെ മികച്ച ബാങ്കാവാനും ഫെഡറൽ ബാങ്കിന് സാധിച്ചു.
പാരിസ്ഥിതിക സുസ്ഥിര പ്രവർത്തനങ്ങളിൽ ഫെഡറൽ ബാങ്കിന്റെ അർപ്പണ ബോധത്തെയും ലക്ഷ്യങ്ങളെയും ആഗോളതലത്തിൽ അംഗീകരിച്ചതിൽ അതിയായ സന്തോഷമുണ്ടെന്ന് ബാങ്ക് സീനിയർ വൈസ് പ്രസിഡന്റും ചീഫ് റിസ്‌ക് ഓഫീസറുമായ ദാമോദരൻ സി. പറഞ്ഞു.
പ്രവർത്തനങ്ങളിലെ അവിഭാജ്യ ഘടകമായാണ് പാരിസ്ഥിതിക ഉത്തരവാദിത്വത്തെ പരിഗണിക്കുന്നത്. അംഗീകാരങ്ങൾ പ്രയത്‌നങ്ങളെ സാധൂകരിക്കുന്നതിനൊപ്പം ധനകാര്യ മേഖലയിൽ പരിസ്ഥിതി സൗഹൃദ മാറ്റങ്ങൾ കൊണ്ടുവരുന്നത് തുടരാൻ പ്രചോദിപ്പിക്കുകയും ചെയ്യുന്നുവെന്ന് അദ്ദേഹം പറഞ്ഞു.