ബൊഗോട്ട : കൊളംബിയയിൽ അവധിയാഘോഷത്തിനിടെ അജ്ഞാതർ തട്ടിക്കൊണ്ടുപോയ അമേരിക്കൻ നടനെ കുത്തേറ്റ് മരിച്ച നിലയിൽ കണ്ടെത്തി. ആക്ടിവിസ്റ്റ് കൂടിയായ ഏഷ്യൻ വംശജൻ ടൂ ഗർ ഷിയോംഗ് (50) ആണ് കൊല്ലപ്പെട്ടത്. നവംബർ 29നാണ് ടൂ കൊളംബിയയിലെ മെഡലിൻ നഗരത്തിലെത്തിയത്. സോഷ്യൽ മീഡിയയിലൂടെ പരിചയപ്പെട്ട ഒരു യുവതിയെ ടൂ ഇക്കഴിഞ്ഞ ഞായറാഴ്ച ഇവിടെ വച്ച് കണ്ടുമുട്ടിയിരുന്നു. ഇതിന് പിന്നാലെ അജ്ഞാത സംഘം ടൂവിനെ തട്ടിക്കൊണ്ടുപോയി കുടുംബാംഗങ്ങളെ ഫോണിൽ വിളിച്ച് 2,000 ഡോളർ ആവശ്യപ്പെട്ടു. എന്നാൽ,​ പണം നൽകുന്നതിന് മുമ്പ് സംഘം ടൂവിനെ വധിക്കുകയായിരുന്നു. ലാ കോർകോവാഡോ മലയിടുക്കിൽ നിന്നാണ് മൃതദേഹം കണ്ടെത്തിയത്. ടൂവിന്റെ സുഹൃത്തെന്ന് കരുതുന്ന യുവതിയെ പൊലീസ് അറസ്റ്റ് ചെയ്തു.