ന്യൂഡല്‍ഹി: കോടതി നടപടികളാകുമ്പോള്‍ അതിന്റേതായ ഒരു കാലതാമസമുണ്ടാകുന്നത് സ്വാഭാവികമാണ്. പെരുകുന്ന കേസുകളുടെ എണ്ണമാണ് ഇതിന് പ്രധാന കാരണം. എത്ര കാലം കഴിയണം കേസൊന്ന് തീര്‍പ്പാകാന്‍? കോടതി വരാന്തയില്‍ കയറി ഇറങ്ങേണ്ടി വരും തുടങ്ങിയ പ്രയോഗങ്ങള്‍ കാലതാമസത്തെ സൂചിപ്പിക്കാനായി കാലാകാലങ്ങളായി നമുക്കെല്ലാം സുപരിചിതവുമാണ്. രാജ്യത്തെ വിവിധ കോടതികളിലായി എത്ര കേസുകളാണ് കെട്ടിക്കിടക്കുന്നതെന്ന് ലോക്‌സഭയില്‍ വ്യക്തമാക്കിയിരിക്കുകയാണ് കേന്ദ്ര നിയമ മന്ത്രി അര്‍ജുന്‍ റാം മേഘ്‌വാള്‍.
ഇന്ത്യയിലെ വിവിധ കോടതികളിലായി അഞ്ച് കോടിയിലധികം കേസുകളാണ് കെട്ടിക്കിടക്കുന്നതെന്നാണ് മന്ത്രി രേഖാമൂലം അറിയിച്ചത്. കൃത്യമായി പറഞ്ഞാല്‍ 5,08,85,856 കേസുകള്‍. ഇതില്‍ സുപ്രീം കോടതിയില്‍ മാത്രം 80,000ല്‍ അധികം കേസുകള്‍ കെട്ടിക്കിടക്കുന്നുണ്ട്. ഹൈക്കോടതിതലത്തില്‍ 61 ലക്ഷം കേസുകളും ബാക്കി വരുന്ന 4.46 കോടി കേസുകള്‍ ജില്ലാ കോടതി മുതലുള്ള കീഴ്‌ക്കോടതികളിലുമാണ് പരിഗണനയിലുള്ളത്.
വിവിധ കോടതികളിലായി രാജ്യത്താകെയുള്ളത് 26,568 ജഡ്ജിമാരാണെന്നും മന്ത്രി കൂട്ടിച്ചേര്‍ത്തു. സുപ്രീംകോടതിയില്‍ ഇത് 34 ജഡ്ജിമാരും ഹൈക്കോടതിയില്‍ 1,114 ജഡ്ജിമാരുമാണുള്ളത്. 25,420 ജഡ്ജിമാരാണ് ജില്ലാ, കീഴ്ക്കോടതികളിലെ ആകെ അംഗസംഖ്യയെന്നും മന്ത്രി വ്യക്തമാക്കി.