വർക്കല: ചായക്കടയിലുണ്ടായ വാക്കുതർക്കം കത്തിക്കുത്തിൽ കലാശിച്ചു. മേൽവെട്ടൂർ ജംഗ്ഷനിലെ ചായക്കടയിൽ വ്യാഴാഴ്ച വൈകിട്ട് 5.30ഓടെയാണ് സംഭവം. വെട്ടൂർ വലയന്റെകുഴി സ്വദേശി രാഹുലിനാണ് (26)കുത്തേറ്റത്.

ചായക്കടയിലെ പഴം പൊരിക്ക് രുചിയില്ലായ്മ ചൂണ്ടിക്കാട്ടി കട നടത്തിപ്പുകാരനുമായി രാഹുൽ സംസാരിക്കവെ, കടയിൽ ചയകുടിക്കുകയായിരുന്ന വെട്ടൂർ അരിവാളം സ്വദേശി അൽത്താഫ് (38) പ്രശ്‌നത്തിൽ ഇടപെട്ടു. തുടർന്ന് രാഹുലും അൽത്താഫും തമ്മിൽ വാക്കേറ്റവും കയ്യങ്കാളിയുമായി. വാക്കേറ്റത്തിനിടെ അൽത്താഫ് കയ്യിൽ കരുതിയിരുന്ന കത്തികൊണ്ട് രാഹുലിന്റെ മുതുകത്ത്‌ കുത്തിയശേഷം വാഹനത്തിൽ കയറി രക്ഷപ്പെട്ടു.

രാഹുൽ പാരിപ്പള്ളി മെഡിക്കൽ കോളജ് ആശുപത്രിയിൽ ചികിത്സയിലാണ്. പ്രതിയെ വർക്കല പൊലീസ് പിടികൂടി. ഇയാൾ അഞ്ചുതെങ്ങ് പൊലീസ് സ്റ്റേഷൻ പരിധിയിൽ കൊലപാതകശ്രമം ഉൾപ്പടെ നിരവധി കേസുകളിൽ പ്രതിയാണെന്ന് പൊലീസ് പറഞ്ഞു. കോടതിയൽ ഹാജരാക്കിയ പ്രതിയെ റിമാന്റ് ചെയ്തു.