നവകേരള ബസിന് നേരെ കരിങ്കൊടി പ്രതിഷേധം നടത്തുന്ന പ്രവർത്തകരെ ക്രൂരമായി മർദിച്ച പൊലീസുകാരുടെ ചിത്രങ്ങൾ പുറത്തുവിട്ട് യൂത്ത് കോൺഗ്രസ് സംസ്ഥാന പ്രസിഡന്റ് രാഹുൽ മാങ്കൂട്ടത്തിൽ. സമരക്കാരെ തെരുവിൽ തല്ലുന്ന വിജയൻസേനയിലെ പൊലീസ് ഗുണ്ടകളെ കണ്ടെത്തുന്നത് വരെ ചിത്രങ്ങൾ പോസ്റ്റ് ചെയ്യുന്നത് തുടരുമെന്ന് കഴിഞ്ഞ ദിവസം രാഹുൽ ഫേസ്ബുക്കിലൂടെ അറിയിച്ചിരുന്നു. ഒരു പൊലീസുകാരന്റെ ചിത്രം പങ്കുവച്ചുകൊണ്ട്, നമ്പർ വൺ ക്രിമിനൽ ആരാണ്? എന്ന ചോദ്യവുമായായിരുന്നു കഴിഞ്ഞ ദിവസത്തെ പോസ്റ്റ്.

ഇപ്പോഴിതാ 'വിജയൻ സേനയിലെ ക്രിമിനൽ പൊലീസ് തലവൻ തിരുവനന്തപുരം സ്വദേശി അനിൽ കുമാർ' എന്ന തലക്കെട്ടോടെയാണ് പുതിയ ചിത്രം പോസ്റ്റ് ചെയ്തിരിക്കുന്നത്. ഇതേ ഉദ്യോഗസ്ഥനെതിരെ വി ഡി സതീശനും രംഗത്തെത്തിയിരുന്നു. 'പൊലീസിൽ അറിയപ്പെടുന്ന ക്രിമിനൽ പശ്ചാത്തലമുള്ളവരെയാണ് മുഖ്യമന്ത്രി കൂടെ കൊണ്ട് നടക്കുന്നത്. സർജറി കഴിഞ്ഞ് നിന്ന ഒരു മാദ്ധ്യമപ്രവർത്തകനെ യാതൊരു പ്രകോപനവുമില്ലാതെ കഴിഞ്ഞ ദിവസം കഴുത്തിന് കുത്തിപ്പിടിച്ച് ആക്രമിച്ചില്ലേ മുഖ്യമന്ത്രിയുടെ ഗൺമാൻ. കല്ലിയൂർ സ്വദേശി അനിൽ എന്ന അതേ ക്രിമിനൽ തന്നെയാണ് ഇപ്പൊ ഞങ്ങളുടെ കുട്ടികളെയും ആക്രമിച്ചത്.' എന്നാണ് വി ഡി സതീശൻ പറഞ്ഞത്.