കോഴിക്കോട് : മുഖ്യമന്ത്രി വാടകയ്ക്കെടുത്ത ക്രിമിനലുകളാണ് തനിക്കിതിരെ പ്രതിഷേധവുമായി രംഗത്ത് വന്നിരിക്കുന്നതെന്ന് ഗവർണർ ആരിഫ് മുഹമ്മദ് ഖാൻ. കനത്ത സുരക്ഷാവലയത്തിൽ കാലിക്കറ്റ് സർവകലാശാലയിൽ എത്തിയ ഗവർണർ മാദ്ധ്യമങ്ങളോട് പ്രതികരിക്കുകയായിരുന്നു. മുഖ്യമന്ത്രി സ്പോൺസർ ചെയ്യുന്ന അതിക്രമമാണ് ക്യാമ്പസിനുള്ളിൽ അരങ്ങേറുന്നത്. സർക്കാരിന്റെ സാമ്പത്തിക പ്രതിസന്ധിയിൽ നിന്നും ശ്രദ്ധ തിരിക്കാനുള്ള ശ്രമമാണ് ഇതെന്നും ഗവർണർ കൂട്ടിച്ചേർത്തു.

ക്യാമ്പസിലെ എസ്.എഫ്.ഐ പ്രതിഷേധം കണ്ടില്ലെന്നും ഗവർണർ പരിഹസിച്ചു. കാറിന് സമീപത്തേക്ക് വന്നാൽ പുറത്തിറങ്ങുമെന്നാണ് പറഞ്ഞത്. പ്രതിഷേധക്കാർ കാറിന് സമീപത്തേക്ക് വന്നാൽ ഇനിയും പുറത്തിറങ്ങും. ഔദ്യോഗിക വാഹനത്തിൽ തട്ടാൻ ആരെയും അനുവദിക്കില്ല. എസ് എഫ് ഐയുടെ പ്രതിഷേധം കണ്ട് ഭയക്കുന്നയാളല്ല താനെന്നും ഗവർണർ പറഞ്ഞു,​.

ഡൽഹിയിൽ നിന്ന് വൈകിട്ട് ഏഴുമണിയോടെ കരിപ്പൂർ വിമാനത്താവളത്തിലെത്തിയ ഗവർണർ 7.15ഓടെയാണ് സർവകലാശാലയിലെത്തിയത്. സർവകലാശാലയ്ക്ക് മുന്നിൽ കുത്തിയിരിപ്പ് സമരവുമായി എത്തിയ എസ്.എഫ്.ഐ പ്രവർത്തകരെ പൊലീസ് അറസ്റ്റ് ചെയ്ത് നീക്കി.