റായ്‌പൂ‌ർ: ഛത്തീസ്ഗഡിൽ സുരക്ഷ ഉദ്യോഗസ്ഥരും മാവോയിസ്റ്റുകളും തമ്മിലുണ്ടായ ഏറ്റുമുട്ടലിൽ സെൻട്രൽ റിസർവ് പൊലീസ് സേനയിലെ ( സിആർപിഎഫ്) സബ് ഇൻസ്‌പെക്ടർക്ക് വീരമൃത്യു. ഒരു കോൺസ്റ്റബിളിന് പരിക്കേറ്റു. സുക്മ ജില്ലയിൽ ഇന്ന് പുലർച്ചയോടെ നടന്ന ഏറ്റുമുട്ടലിൽ എസ്ഐ സുധാകർ റെഡ്ഡിയ്ക്കാണ് വീരമൃത്യു സംഭവിച്ചത്.
സിആർപിഏഫിലെ 165-ാം ബറ്റാലിയനിലെ ഉദ്യോഗസ്ഥരും മാവോയിസ്റ്റുകളും ജാഗർഗുണ്ട പൊലീസ് സ്റ്റേഷൻ പരിധിയിലാണ് ഏറ്റുമുട്ടിയത്. ഇന്ന് രാവിലെ ഏഴ് മണിയോടെ ബറ്റാലിയൻ ബെഡ്രെ ക്യാമ്പിൽ നിന്ന് ഉർസങ്കൽ ഗ്രാമത്തിലേക്ക് പോകുന്നതിനിടെയായിരുന്നു സംഭവം. പരിക്കേറ്റ കോൺസ്റ്റബിളിനെ വിദഗ്ദ്ധ ചികിത്സയ്ക്കായി ആശുപത്രിയിലേക്ക് മാറ്റിയിട്ടുണ്ടെന്നും സംഭവസ്ഥലത്ത് നിന്ന് നാല് പേരെ പിടികൂടിയിട്ടുണ്ടെന്നും അധികൃതർ അറിയിച്ചു. മറ്റുളളവർക്കായി തിരച്ചിൽ പുരോഗമിക്കുകയാണ്.