നേര് അറിയിക്കാൻ മോഹൻലാൽ

ആലസ്യത്തിൽ കഴിയുന്ന തിയേറ്ററുകളെ ഉണർത്താൻ ഈ ആഴ്ച എത്തുന്ന ക്രിസ് മസ് ചിത്രങ്ങൾക്ക് കഴിയുമെന്നാണ് പ്രതീക്ഷ . മോഹൻലാൽ - ജീത്തു ജോസഫ് കൂട്ടുകെട്ടിൽ നേര്, പ്രഭാസ് - പ്രശാന്ത് നീൽ ചിത്രം സലാർ,ഷാരൂഖ് ഖാൻ - രാജ് കുമാർ ഹിറാനി ചിത്രം ഡൻങ്കി എന്നിവയാണ് ക്രിസ്മസ് ചിത്രങ്ങൾ.സലാറും ഡൻങ്കിയും ബോക്സ് ഒാഫീസിൽ ഏറ്റുമുട്ടും. ഡിസംബർ 21ന് റിലീസ് ചെയ്യുന്ന നേര് കോർട്ട് റൂം ഡ്രാമയാണ്. പ്രിയാമണിയാണ് നായിക. ജഗദീഷ്, സിദ്ദിഖ്, ഗണേഷ് കുമാർ, അനശ്വര രാജൻ, ശാന്തി മായാദേവി തുടങ്ങിയവരാണ് മറ്റു താരങ്ങൾ. ജീത്തുജോസഫും ശാന്തി മായാദേവിയും ചേർന്നാണ് രചന. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മാണം.പ്രശാന്ത് നീൽ- പ്രഭാസ് ചിത്രം സലാറും ഷാരൂഖ് ഖാൻ - രാജ് കുമാർ ഹിരാനി ചിത്രം ഡൻങ്കിയും 22നാണ് റിലീസ് ചെയ്യുക. ഇന്ത്യൻ സിനിമയിലെ ഏറ്റവും വലിയ ക്ളാഷ് റിലീസാണ് സംഭവിക്കാൻ പോവുന്നത്.കെ.ജി.എഫ് സിനിമകളിലൂടെ പ്രശസ്തനായ പ്രശാന്ത് നീലിനൊപ്പം പ്രഭാസ് ഒരുമിക്കുമ്പോൾ ആരാധക പ്രതീക്ഷ വാനോളം ഉയരുന്നു. മലയാളത്തിൽ നിന്ന് പൃഥ്വിരാജിന്റെ സാന്നിദ്ധ്യമാണ് സലാറിന്റെ മറ്റൊരു ആകർഷണീയത.പാൻ ഇന്ത്യൻ ചിത്രമായി ഒരുങ്ങുന്ന സലാറിൽ ശ്രുതി ഹാസൻ ആണ് മറ്റൊരു പ്രധാന താരം. പത്താൻ, ജവാൻ എന്നീ ബോക്സ് ഒാഫീസ് റെക്കോർഡുകൾക്കു ശേഷം ഇൗവർഷം എത്തുന്ന മൂന്നാമത്തെ ഷാരൂഖ് ഖാൻ ചിത്രമാണ് ഡൻങ്കി. രാജ് കുമാർ ഹിരാനിയും ഷാരൂഖ് ഖാനും ആദ്യമായാണ് ഒരുമിക്കുന്നത്.തപ്‌സി പന്നു ആണ് നായിക.