എല്ലാവരുടെയും സ്വപ്നമാണ് മരങ്ങളും പച്ചപ്പും നിറഞ്ഞ വീട്ടുമു​റ്റം. എന്നാൽ നമ്മുടെ വീടിനു മുന്നിൽ ഏത് മരം നടണം എന്ന കാര്യത്തിൽ പ്രത്യേക ശ്രദ്ധ വേണമെന്നാണ് വാസ്തുശാസ്ത്രം അനുശാസിക്കുന്നത്. ചില മരങ്ങളും ചെടികളും ഗൃഹത്തിൽ വസിക്കുന്നവർക്ക് ദോഷം വരുത്തുമെന്നാണ് വിശ്വാസം. അതുപോലെ വീടിന് ചു​റ്റും മരങ്ങൾ നടാൻ അനുയോജ്യമായ സ്ഥാനങ്ങളും വാസ്തുശാസ്ത്രത്തിൽ പറയുന്നുണ്ട്. സ്വർണം കായ്ക്കുന്ന പൂമരമായാലും വീടിന് സമീപം വയ്ക്കാൻ പാടില്ല എന്നാണ് ശാസ്ത്രം പറയുന്നത്. ജീവിതത്തിൽ ഗുണകരമായ സാന്നിദ്ധ്യമാകുന്ന വൃക്ഷങ്ങൾ വേണം വീട്ടുവളപ്പിൽ വളർത്തേണ്ടത്.

വീടിന് സമീപം പാടില്ലാത്ത വൃക്ഷങ്ങൾ

കാഞ്ഞിരം, ചേര്, വയ്യങ്കത, താന്നി, കള്ളിപ്പാല തുടങ്ങിയവ വീടിന് സമീപം നടുന്നത് നല്ലതല്ല. ഇത് വാസ്തുശാസ്ത്രപരമായി ദോഷം ചെയ്യുന്നുവെന്നാണ് വിശ്വാസം.

വീടിന് സമീപം നടാവുന്നവ

വാഴ, പിച്ചകം, വെറ്റിലക്കൊടി മുതലായവ വീടിന്റെ ഏത് ദിക്കിലും വയ്ക്കാവുന്നവയാണ്. കുമിഴ്, കൂവളം, കടുക്ക, താന്നി, കൊന്ന, നെല്ലി, ദേവദാരു,പ്ലാശ്, അശോകം, ചന്ദനം, പുന്ന,വേങ്ങ, ചെമ്പകം, കരിങ്ങാലി എന്നിവ ഗൃഹപാർശ്വങ്ങളിൽ നടുന്നതുകൊണ്ട് ദോഷമില്ല. പ്ലാവ്, പൂത്തിലഞ്ഞി, പേരാൽ എന്നിവ വീടിന്റെ കിഴക്ക് വശത്തും അത്തി, പുളിമരം എന്നിവ തെക്കുവശത്തും നടാവുന്നതാണ്. വടക്കുവശത്ത് പുന്നയും ഇത്തിയും നാഗമരവും മാവും വയ്ക്കാവുന്നതാണ്. കിഴക്ക് പ്ലാവും വടക്ക് മാവും പടിഞ്ഞാറ് തെങ്ങും നടുന്നത് വളരെ നല്ലതാണ്.