അതിവേഗം വളർന്നു കൊണ്ടിരിക്കുന്ന സാങ്കേതിക മേഖലയാണ് ആർട്ടിഫിഷ്യൽ ഇന്റലിജൻസ് അഥവാ നിർമ്മിത ബുദ്ധി എ.ഐ ഇന്ന് സകല മേഖലകളിലും സജീവ സാന്നിദ്ധ്യമാണ്. . മരിച്ചവരും ജീവിച്ചിരിക്കുന്നവരും ആയ ആളുകളുടെ ക്ലോണുകൾ വരെ എഐ സാങ്കേതിക വിദ്യയിൽ ചിത്രങ്ങളായും വീഡിയോ ആയും ലഭിക്കും. കൂടാതെ കഥ,​ നോവൽ,​ തിരക്കഥ,,​ ചിത്രരചന തുടങ്ങി വിവിധ മേഖലകളിൽ എ.ഐ ടൂളുകൾ പുതുതായി രംഗപ്രവേശനം ചെയ്തുകഴിഞ്ഞു.

എ.ഐ ഉപയോഗിച്ച് ഒരാളുടെ ആയുസ് വരെ പ്രവചിക്കാൻ കഴിയുമെന്ന അവകാശപ്പെട്ട് രംഗത്തെത്തിയിരിക്കുകയാണ് ഡെൻമാർക്കിലെ ശാസ്ത്രജ്ഞർ. ഡെൻമാർക്ക് ടെക്നിക്കൽ യൂണിവേഴ്‌സിറ്റിയിലെ ഗവേഷകരാണ് ഈ എ.ഐ മോഡലിന് പിന്നിൽ. ചാറ്റ് ജിപിടിയുടെ മാതൃകയിൽ വികസിപ്പിച്ച ലൈഫ്2വെക് (LIFE2VEC) ആണ് ഈ എ.ഐ മോഡൽ. രാജ്യത്തെ ജനങ്ങളുടെ വ്യക്തിഗത ഡാറ്റ ഉപയോഗിച്ചാണ് ഈ മോഡലിനെ പരിശീലിപ്പിച്ചിരിക്കുന്നത്. ആരോഗ്യം,​ വിദ്യാഭ്യാസം,​ തൊഴിൽ,​ വരുമാനം തുടങ്ങിയ വ്യക്തിഗത വിവരങ്ങൾ അടിസ്ഥാനമാക്കിയാണ് ലൈഫ്2വെക്കിന്റെ പ്രവചനം. ഓരോരുത്തരുടെയും ജീവിതത്തിൽ നടക്കുന്ന സംഭവ വികാസങ്ങളെ അടിസ്ഥാനമാക്കിയാണ് ഈ എ.ഐ മോഡൽ ആയുസ് പ്രവചിക്കുകയെന്നും ഗവേഷകർ പറയുന്നു. നിലവിലുള്ള ഏതൊരു സംവിധാനത്തെക്കാളും കൂടുതൽ കൃത്യമായി ആളുകളുടെ മരണസമയം പ്രവചിക്കാൻ ഈ മോഡലിന് കഴിയുമെന്നും ശാസ്ത്രജ്‍ഞർ വ്യക്തമാക്കി.

മരണം പ്രവചിക്കാനുള്ള ഒരു സംവിധാനം വേണമെന്ന് ആളുകൾ വർഷങ്ങളായി ആലോചിക്കുന്ന കാര്യമാണ്. അതിനെക്കുറിച്ച് ഞങ്ങൾക്ക് നല്ല ബോദ്ധ്യമുണ്ടായിരുന്നെന്ന് പഠനത്തിന് നേതൃത്വം നൽകിയ ശാസ്ത്രജ്ഞരിൽ ഒരാളായ സുനെ ലേമാൻ പറഞ്ഞു.