ഇന്നത്തെ ദിവസത്തിന് ഒരു പ്രത്യേകതയുണ്ട്. ഈ വർഷത്തെ ഏറ്റവും ദൈർഘ്യം കുറഞ്ഞ പകലും ‌ദൈർഘ്യം കൂടിയ രാത്രിയും അനുഭവപ്പെടുന്ന ദിവസമാണ് ഇന്ന്. ഈ പ്രതിഭാസത്തെ ശൈത്യകാല അറുതി (വിന്റർ സോളിസ്റ്റിസ്) എന്നറിയപ്പെടുന്നു. സാധാരണ എല്ലാവർഷവും ഡിസംബർ 21നും 22നും ഇടയിലാണ് ഈ പ്രതിഭാസം അനുഭവപ്പെടാറുളളത്.

ഉത്തരാർദ്ധഗോളം സൂര്യനിൽ നിന്നും അകലെ മാറി നിൽക്കുന്നതുകൊണ്ടാണ് ഈ ദിവസത്തിൽ പകലിന്റെ ദൈർഘ്യം കുറവും രാത്രിയുടെ ദൈർഘ്യം കൂടുതലായും അനുഭവപ്പെടുന്നത്. ഈ ദിവസങ്ങളിൽ ഭൂമി അതിന്റെ അച്ചുത്തണ്ടിൽ നിന്നും 23.4 ഡിഗ്രി ചരിഞ്ഞിരിക്കുന്നു.അതിനാൽ ഭൂമിയുടെ ധ്രുവം പകൽ സമയത്ത് സൂര്യന്റെ നേരെയോ അല്ലെങ്കിൽ അകലെയോ ആയിരിക്കും. എല്ലാവർഷവും ഈ ദിവസം സൂര്യന്റെ ആർക്ക് (ചാപം) ഉയരുകയും താഴുകയും ചെയ്യും.

ഇന്ന് രാവിലെ ഒമ്പത് മണിയോടുകൂടിയാണ് ശൈത്യകാല അറുതി ആരംഭിച്ചത്. ഇന്നത്തെ പകലിന്റെ ദൈർഘ്യം ഏഴ് മണിക്കൂറും 14 മിനിട്ടുമായിരിക്കും. സാധാരണ ഈ പ്രതിഭാസം വാനനിരീക്ഷകർ വീക്ഷിക്കുന്നത് സൂര്യോദയ സമയത്തും സൂര്യാസ്തമയ സമയത്തുമാണ്.