ന്യൂഡൽഹി: ഉത്സവക്കാലവും പുതുവർഷവും കണക്കിലെടുത്ത് സംസ്ഥാനങ്ങൾക്ക് അധിക നികുതി വിഹിതം അനുവദിച്ച് കേന്ദ്ര സർക്കാ‌‌ർ. വിവിധ സാമൂഹിക ക്ഷേമ നടപടികൾക്കും അടിസ്ഥാന സൗകര്യ വികസന പദ്ധതികൾക്കുമായി 72,961.21 കോടി രൂപയാണ് അധിക നികുതി വിഹിതമായി അനുവദിച്ചിട്ടുള്ളത്. ഇതിൽ നിന്ന് 1404.50 കോടി രൂപയാണ് കേരളത്തിന് ലഭിക്കുക.

കടുത്ത സാമ്പത്തിക പ്രതിസന്ധി നേരിടുന്ന കേരളത്തിന് താൽക്കാലിക ആശ്വാസമാണ് ഈ വിഹിതം. ഡിസംബർ 11ന് നൽകിയ നികുതി വിഹിതത്തിനും ജനുവരി 10ന് നൽകേണ്ട നികുതി വിഹിതത്തിനും പുറമെയാണ് ഇപ്പോൾ അനുവദിച്ചിരിക്കുന്ന ഗഡുവെന്നും കേന്ദ്ര സർക്കാർ അറിയിച്ചു. ഉത്തര്‍പ്രദേശിനാണ് നികുതി വിഹിതമായി ഏറ്റവും കുടുതല്‍ തുക അനുവദിച്ചത്. 13088 കോടി രൂപ യുപി സര്‍ക്കാരിന് ലഭിക്കും.