മുംബയ്: റിസർവ് ബാങ്കിന് ബോംബ് ഭീഷണി സന്ദേശം. ആർബിഐ ഗവർണർ ശക്തികാന്ത ദാസ്, കേന്ദ്ര ധനമന്ത്രി നിർമ്മല സീതാരാമൻ എന്നിവരുടെ രാജി ആവശ്യപ്പെട്ടാണ് ബോംബ് ഭീഷണി സന്ദേശം എത്തിയത്. മുംബയിലെ ആർബിഐ ഓഫീസ് ഉൾപ്പടെ 11 സ്ഥലങ്ങളിൽ ബോംബ് വച്ചിട്ടുണ്ടെന്നാണ് ഇമെയിലിൽ ലഭിച്ച ഭീഷണി സന്ദേശത്തിൽ പറയുന്നു. എച്ച്ഡിഎഫ്സി, ഐസിഐസിഐ ബാങ്ക് എന്നിവിടങ്ങളിൽ 1.30 സ്‌ഫോടനം നടക്കുമെന്നും സന്ദേശത്തിൽ വ്യക്തമാക്കുന്നു.

പരിശോധനയിൽ സംശയാസ്പദമായതൊന്നും കണ്ടെത്തിയിട്ടില്ല. എംആർഎ മാർഗ് പൊലീസ് സ്റ്റേഷൻ സംഭവത്തിൽ എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിച്ചു. ക്രിസ്തുമസ്- പുതുവത്സര ആഘോഷങ്ങൾ നഗരത്തിലെ പലഭാഗത്ത് നടക്കുന്ന ഈ സമയത്ത് ബോംബ് ഭീഷണി സന്ദേശം എത്തിയത് ആശങ്കയ്ക്ക് ഇടയാക്കുന്നു. എന്നാൽ ഇത് വ്യാജ സന്ദേശമായിരിക്കുമെന്ന നിഗമനത്തിലാണ് അന്വേഷണ ഏജൻസികൾ.