കോട്ടയം: സ്‌റ്റേഷനില്‍ നിന്ന് ഓടിത്തുടങ്ങിയ ട്രെയിനില്‍ നിന്ന് യാത്രക്കാരിയുടെ സ്വരണമാല പൊട്ടിച്ചെടുത്ത കേസില്‍ പ്രതി പിടിയില്‍. അസം സ്വദേശി അബ്ദുള്‍ ഹുസൈനാണ് കേസില്‍ പിടിയിലായത്. ക്രിസ്മസ് ദിവസം രാവിലെ 11.30ന് കോട്ടയം റെയില്‍വേ സ്‌റ്റേഷനിലാണ് സംഭവം നടന്നത്.
പ്ലാറ്റ്‌ഫോമില്‍ നിന്ന് ട്രെയിന്‍ ഓടിത്തുടങ്ങിയപ്പോള്‍ വിന്‍ഡോ സീറ്റില്‍ ഇരിക്കുകയായിരുന്ന തൃശ്ശൂര്‍ സ്വദേശിനിയുടെ മാല പ്രതി പൊട്ടിച്ചെടുക്കുകയായിരുന്നു.
തുടര്‍ന്ന് മാലയുമായി ഇയാള്‍ സ്റ്റേഷനിലൂടെ നടന്നുപോകുന്നതും സിസിടിവി ക്യാമറയില്‍ പതിഞ്ഞിരുന്നു. അതേദിവസം തന്നെ അമൃത എക്സ്പ്രസില്‍ ഉറങ്ങികിടക്കുകയായിരുന്ന യാത്രക്കാരന്റെ മൊബൈല്‍ഫോണും ഇയാള്‍ മോഷ്ടിച്ചു. തുടര്‍ന്ന് രണ്ട് യാത്രക്കാരുടെയും പരാതിയില്‍ പോലീസ് നടത്തിയ അന്വേഷണത്തിലാണ് അബ്ദുള്‍ ഹുസൈനെ പിടികൂടിയത്.
ശബരിമല തീര്‍ഥാടനകാലമായതിനാല്‍ സംശയം തോന്നാതിരിക്കാനായി കറുത്തവസ്ത്രം ധരിച്ചാണ് പ്രതി മോഷണം നടത്തിയതെന്ന് പൊലീസ് പറഞ്ഞു. കോട്ടയത്ത് എത്തി കഴിഞ്ഞ ഒരുവര്‍ഷമായി ഇയാള്‍ കാഞ്ഞിരപ്പള്ളിയില്‍ പെയിന്റിങ് തൊഴിലാളിയായി ജോലി ചെയ്തുവരികയാണ്.