കൊല്ലം: ജീവിത ശൈലി രോഗങ്ങൾ കണ്ടെത്താൻ ശൈലി ആപ്പ് വഴി ആരോഗ്യവകുപ്പ് നടത്തിയ സർവേയിൽ, ജില്ലയിലെ 1.60 ലക്ഷം പേരി​ൽ ഉയർന്ന രക്തസമ്മർദ്ദം സ്ഥി​രീകരിച്ചു. 15 ഇന ചോദ്യാവലി കൊടുത്ത് തയ്യാറാക്കിയ സർവേയിൽ അർബുദരോഗത്തിന്റെ സാദ്ധ്യത കണ്ടെത്തിയ 72,162 പേരെ തുടർചികിത്സയ്ക്കായി റഫർ ചെയ്തു.

സംസ്ഥാനത്ത് ഉയർന്ന രക്തസമ്മർദ്ദമുള്ള ജില്ലകളിൽ രണ്ടാംസ്ഥാനം കൊല്ലത്തിനാണ്. തൃശൂരാണ് ഒന്നാമത്. ജി​ല്ലയി​ൽ ആകെ 72,162 പേരി​ലാണ് അർബുദ സാദ്ധ്യത കണ്ടെത്തിയത്. സ്തനാർബുദ പരിശോധനയ്ക്കായി റഫർ ചെയ്തത് 60,153 പേരെയാണ്. 3,534 പേരുടെ വായ്ക്കുള്ളി​ലും അർബുദ സാദ്ധ്യത കണ്ടെത്തി​.

ആദ്യഘട്ടം പൂർത്തി​യായി​
ആരോഗ്യവകുപ്പ് തയ്യാറാക്കിയ പ്രത്യേക ചോദ്യാവലിയുടെ അടിസ്ഥാനത്തിലാണ് സർവേ നടത്തുന്നത്. ജില്ലയിലെ 11 മണ്ഡലങ്ങളിലും സർവേയുടെ ആദ്യ ഘട്ടം പൂർത്തിയാക്കി. രോഗ സാദ്ധ്യത കണ്ടെത്തിയവർക്ക് സർക്കാർ ചികിത്സയ്ക്കുള്ള സഹായം ഒരുക്കി നൽകും.

30 വയസിനും 60 വയസിനും ഇടയിലുള്ളവരി​ലാണ് സർവേ നടത്തിയത്. 45 വയസ്‌ പിന്നിട്ട സ്ത്രീകളിലാണ് സ്തനാർബുദ ലക്ഷണങ്ങൾ കണ്ടെത്തിയത്.

ശൈലി​ സർവേ ജില്ലയിൽ

സർവേ നടത്തിയത് : 16 ആരോഗ്യ ബ്ലോക്കുകളിൽ സർവേയിൽ പങ്കെടുത്തവർ: 12,94,200 ജില്ലയുടെ സ്‌കോർ: 2,48,516 ഉയർന്ന രക്തസമ്മർദ്ദമുള്ളവർ: 16,04,77 പ്രമേഹ ബാധി​തർ: 12,17,93 പ്രമേഹവും രക്താതിസമ്മർദവുമുള്ളവർ: 73,493

ക്ഷയരോഗ നിർണയത്തിന് റഫർ ചെയ്തവർ: 10,625

ശ്വാസകോശ രോഗമുള്ളവർ: 49,070