പത്തനംതിട്ട : പത്തനംതിട്ട മൈലപ്രയിൽ വൃദ്ധനെ കടയ്ക്കുള്ളിൽ മരിച്ച നിലയിൽ കണ്ടെത്തി. മൈലപ്ര സ്വദേശിയും വ്യാപാരിയുമായ ജോർജ് ഉണ്ണുണ്ണിയാണ് (72)​ മരിച്ചത്. വായിൽ തുണി തിരുകി കൈകാലുകൾ കെട്ടിയ നിലയിലായിരുന്നു മൃതദേഹം കണ്ടെത്തിയത്. പൊലീസ് സ്ഥലത്തെത്തി പരിശോധന നടത്തി,​

കൊലപാതകമെന്നാണ് പൊലീസ് സംശയിക്കുന്നത്,​ കൂടുതൽ അന്വേഷണങ്ങൾക്ക് ശേഷം മാത്രമേ വിശദാംശങ്ങൾ വ്യക്തമാകൂ എന്ന് പൊലീസ് പറഞ്ഞു.

മൈലപ്രയിൽ സ്റ്റേഷനറി സാധനങ്ങളും പലവ്യജ്ഞനങ്ങളും വിൽക്കുന്ന കടയിലാണ് സംഭവം. വർഷങ്ങളായി മൈലപ്രയിൽ കട നടത്തി വരികയായിരുന്നു ജോർജ് ഉണ്ണുണ്ണി.

കടയിലെ സി.സി ടിവിയുടെ ഹാർഡ് ഡിസ്ക് കാണാനില്ലെന്നാണ് വിവരം. . മോഷണശ്രമത്തിനിടെയുള്ള കൊലപാതകമാണെന്നാണ് സംശയിക്കുന്നത്. സിസിടിവി ദൃശ്യങ്ങൾ ഉൾപ്പെടെ പരിശോധിച്ചാണ് അന്വേഷണം,​