ഒറ്റപ്പാലം: വൃക്കരോഗികൾക്ക് സാന്ത്വനമേകി ഒറ്റപ്പാലം ബ്ലോക്ക് പഞ്ചായത്തിന്റെ ഡയാലിസിസ് ചികിത്സ ധനസഹായ പദ്ധതി. തദ്ദേശ സ്ഥാപനങ്ങളുടെ വാർഷിക പദ്ധതിയിൽ ഉൾപ്പെടുത്തി ഡയാലിസിന് വിധേയരായ വൃക്കരോഗികളിൽ ഒരാൾക്ക് പരമാവധി 4000 രൂപ നൽകുന്നതാണ് പദ്ധതി.

തുക ആശുപത്രികൾക്കാണ് കൈമാറുക. ഒരു ഡയാലിസിന് 1000 രൂപയാണ് ലഭിക്കുക. ഒറ്റപ്പാലം ബ്ലോക്ക് പഞ്ചായത്തും ബ്ലോക്കിന് കീഴിലെ പഞ്ചായത്തുകളും ചേർന്നാണ് പദ്ധതി നടപ്പാക്കുന്നത്. 2023-24 സാമ്പത്തിക വർഷം ബ്ലോക്ക് പഞ്ചായത്ത് വാർഷിക ഫണ്ടിൽ നിന്ന് 11 ലക്ഷം രൂപയും ബ്ലോക്ക് പരിധിയിലെ എട്ട് പഞ്ചായത്തുകൾ വാർഷിക പദ്ധതിയിൽ ഉൾപ്പെടുത്തി രണ്ടുലക്ഷം രൂപ വീതവും വകയിരുത്തിയാണ് പദ്ധതി നടപ്പാക്കുന്നത്. നിലവിൽ ബ്ലോക്ക് പരിധിയിലെ 73 രോഗികൾക്ക് പദ്ധതിയുടെ പ്രയോജനം ലഭിക്കുണ്ട്.
അമ്പലപ്പാറ പഞ്ചായത്തിൽ എട്ട്, ലക്കിടിപേരൂർ പഞ്ചായത്തിൽ ഒമ്പത്, തൃക്കടീരി പഞ്ചായത്തിൽ ആറ്, വാണിയംകുളം പഞ്ചായത്തിൽ അഞ്ച്, അനങ്ങനടി പഞ്ചായത്തിൽ അഞ്ച്, ചളവറ പഞ്ചായത്തിൽ നാല്, നെല്ലായ പഞ്ചായത്തിൽ 17, വല്ലപ്പുഴ പഞ്ചായത്തിൽ 19 പേർ ഇതിൽ ഉൾപ്പെടും. ഒരു മാസം ഏകദേശം 1,80,000 രൂപയാണ് പദ്ധതിക്കായി ചെലവാകുന്നത്.

2022 ഏപ്രിലിലാണ് ബ്ലോക്ക് പഞ്ചായത്തിൽ പദ്ധതി ആരംഭിച്ചത്. 2022-23 സാമ്പത്തിക വർഷം 11 ലക്ഷം രൂപയാണ് പദ്ധതിക്കായി വകയിരുത്തിയത്. അതിൽ 10.87 ലക്ഷം 75 ഗുണഭോക്താക്കൾക്കായി ചെലവഴിച്ചു. 2023 ഏപ്രിൽ മുതൽ ഇതുവരെ 10.55 ലക്ഷവും ചെലവഴിച്ചു.