ചെർപ്പുളശേരി: നഗരസഭയിൽ നഗര ജനകീയ ആരോഗ്യ കേന്ദ്രം ആരംഭിക്കുന്നു. വീരമംഗലം ഉങ്ങുംതറയിലാണ് പുതിയ ആരോഗ്യ കേന്ദ്രം പ്രവർത്തനം ആരംഭിക്കുന്നത്. പൊതുജന ആരോഗ്യ സംരക്ഷണത്തിന് കൂടുതൽ സൗകര്യം ഒരുക്കുന്നതിന്റെ ഭാഗമായി ആരംഭിക്കുന്ന ജനകീയ ആരോഗ്യ കേന്ദ്രത്തിൽ വിദഗ്ദ്ധ ഡോക്ടർമാരുടെയും ആരോഗ്യ പ്രവർത്തകരുടെയും സേവനം ലഭിക്കും. മികച്ച ചികിത്സാ സൗകര്യം, അമ്മമാരുടെയും കുഞ്ഞുങ്ങളുടെയും ആരോഗ്യ സംരക്ഷണത്തിന് പ്രത്യേക ഊന്നൽ, പ്രമേഹം, രക്തസമ്മർദ്ദം തുടങ്ങിയ ജീവിതശൈലി രോഗങ്ങൾക്കുള്ള ചികിത്സ, സാന്ത്വന പരിചരണം, പകർച്ചവ്യാധി തടയുന്നതിനുള്ള പ്രവർത്തനങ്ങൾ തുടങ്ങിയ സേവനങ്ങളാണ് ആരോഗ്യ കേന്ദ്രത്തിലൂടെ ലക്ഷ്യമിടുന്നത്.
നാഷണൽ ഹെൽത്ത് മിഷന്റെ സഹകരണത്തോടെയാണ് നഗരസഭ ആരോഗ്യ കേന്ദ്രം ആരംഭിക്കുന്നത്. നഗരസഭയിലെ രണ്ടാമത്തെ ആരോഗ്യകേന്ദ്രമാണിത്. ആദ്യത്തേത് മൂന്നുമാസം മുമ്പ് കാറൽമണ്ണയിൽ പ്രവർത്തനം ആരംഭിച്ചു. നഗര ജനകീയ ആരോഗ്യ കേന്ദ്രത്തിന്റെ ഉദ്ഘാടനം 18ന് വൈകിട്ട് മൂന്നിന് പി. മമ്മിക്കുട്ടി എം.എൽ.എ നിർവഹിക്കും. നഗരസഭാദ്ധ്യക്ഷൻ പി.രാമചന്ദ്രൻ അദ്ധ്യക്ഷനാവും. ഉപാദ്ധ്യക്ഷ കമലം ഫാർമസി ഉദ്ഘാടനം നിർവഹിക്കും. ഡി.എം.ഒ ഡോ.കെ.ആർ വിദ്യ വിശിഷ്ടാതിഥിയാവും. നാഷണൽ ഹെൽത്ത് മിഷൻ ജില്ലാ പ്രോഗ്രാം മാനേജർ ഡോ.ടി.വി.റോഷ് റിപ്പോർട്ടവതരിപ്പിക്കും