മലമ്പുഴ: നിയോജക മണ്ഡലത്തിലെ നാല് റേഷൻ കടകൾ കെ-സ്റ്റോറുകളായി പ്രവർത്തനം ആരംഭിച്ചു. എ.പ്രഭാകരൻ എം.എൽ.എ ഉദ്ഘാടനം ചെയ്തു. എലപ്പുള്ളി കാക്കത്തോട് 162-ാം നമ്പർ റേഷൻ കട, എലപ്പുള്ളി വേങ്ങോടി 81-ാം നമ്പർ റേഷൻ കട, പുതുശേരി ചടയൻ കാലായ് 117-ാം നമ്പർ റേഷൻ കട, കൊടുമ്പ് ഓലശേരി 78-ാം നമ്പർ റേഷൻ കട എന്നിവയാണ് കെ-സ്റ്റോറുകളായി മാറിയത്.

റേഷൻ കടകളുടെ മുഖച്ഛായ മാറ്റി സാധാരണക്കാർക്ക് ആശ്രയിക്കാൻ കഴിയുന്ന വിധത്തിൽ സേവനങ്ങൾ കൂടുതൽ മിതമായ നിരക്കിൽ ലഭ്യമാക്കാനാണ് ജനോപകാരപ്രദമായ കെ-സ്റ്റോർ (കേരളത്തിന്റെ സ്വന്തം സ്റ്റോർ) പദ്ധതിയിലൂടെ ലക്ഷ്യമാക്കുന്നത്.

സപ്ലൈകോ ശബരി, മിൽമ ഉത്പന്നങ്ങൾ എന്നിവ സപ്ലൈക്കോ നിരക്കിൽ കെ-സ്റ്റോറിൽ ലഭിക്കും. കൂടാതെ അഞ്ച് കിലോഗ്രാം തൂക്കമുള്ള ചോട്ടുഗ്യാസ് കെ-സ്റ്റോറുകളിൽ ലഭ്യമാണ്. വൈദ്യുതി, വാട്ടർ ബിൽ തുടങ്ങിയവ അടക്കാനുള്ള സൗകര്യവും കെ-സ്റ്റോറിലുണ്ട്. കെ-സ്റ്റോറുകളിലെ ബാങ്കിംഗ് സംവിധാനത്തിലൂടെ 10,000 രൂപ വരെ പിൻവലിക്കാം. ഇതിലൂടെ ഗ്രാമപ്രദേശങ്ങളിലെ സാധാരണക്കാർക്ക് ബാങ്കിംഗ് സംവിധാനം എളുപ്പത്തിലാക്കുകയാണ് ലക്ഷ്യം.
എലപ്പുള്ളി, പുതുശേരി, കൊടുമ്പ് പഞ്ചായത്ത് പ്രസിഡന്റുമാരായ കെ.രേവതി ബാബു, എൻ.പ്രസീത, ആർ.ധനരാജ്, വൈസ് പ്രസിഡന്റുമാരായ എസ്.സുനിൽകുമാർ, കെ.അജീഷ്, എം.കെ.ശാന്ത, താലൂക്ക് സപ്ലൈ ഓഫീസർ പി.വി.ലത, റേഷനിംഗ് ഇൻസ്പെക്ടർ എസ്.രഞ്ജിത്ത്, തുടങ്ങിയവർ പങ്കെടുത്തു.