അടൂർ: എൻജിനീയർമാരുടെയും സൂപ്പർവൈസർമാരുടെയും സംഘടനയായ ലൈസൻസ്ഡ് എൻജിനിയേഴ്‌സ് ആൻഡ് സൂപ്പർവൈസേഴ്‌സ് ഫെഡറേഷന്റെ (ലെൻസ്‌ഫെഡ്) 13-മത് ജില്ലാ സമ്മേളനം അടൂർ ഗ്രീൻവാലി കൺവെൻഷൻ സെന്ററിൽ നടന്നു. കെട്ടിട നിർമ്മാണ സാമഗ്രികളുടെ വിലക്കയറ്റം നിയന്ത്രിക്കാൻ സർക്കാർ ഇടപെടണമെന്നും വിലക്കയറ്റം നിയന്ത്രിക്കാൻ സർക്കാർ പ്രത്യേക സമിതി രൂപീകരിക്കണമെന്നും ലെൻസ്‌ഫെഡ് ജില്ലാ സമ്മേളനം ആവശ്യപ്പെട്ടു. കെട്ടിട നിർമ്മാണ പെർമിറ്റ് ഫീസ് വർദ്ധനസർക്കാർ അടിയന്തരമായി പുന:പരിശോധിക്കണമെന്നും തദ്ദേശഭരണ സ്ഥാപനങ്ങളിലെ മരാമത്ത് ജോലികളിൽ ലൈസൻസ്ഡ് എൻജിനിയേഴ്‌സിനെ ഉൾപ്പെടുത്തി ഈ മേഖലയെ കുറ്റമറ്റതാക്കാൻ സർക്കാർ നടപടിയെടുക്കണമെന്നും സമ്മേളനം ആവശ്യപ്പെട്ടു. ജില്ലയിലെ 300 എൻജിനീർമാർ സമ്മേളനത്തിൽ പങ്കെടുത്തു. പൊതുസമ്മേളനം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. ജില്ലാ പ്രസിഡന്റ് ജി.ജയകുമാർ ബിൽടെക് അദ്ധ്യക്ഷത വഹിച്ചു. അടൂർ നഗരസഭ ചെയർപേഴ്‌സൺ ദിവ്യാ റജി മുഹമ്മദ് മുഖ്യാതിഥിയായി. ലെൻസ്‌ഫെഡ് സംസ്ഥാന പ്രസിഡന്റ് സി.എസ് വിനോദ്കുമാർ മുഖ്യപ്രഭാഷണം നടത്തി. ലെൻസ്‌ഫെഡിന്റെ ജില്ലയിലെ 50 മുതിർന്ന നേതാക്കളെ ചടങ്ങിൽ ആദരിച്ചു. ജില്ലയിലെ ദമ്പതികളായ എൻജിനീയർമാരെയും ആദരിച്ചു. പ്രതിനിധി സമ്മേളനം ലെൻസ്‌ഫെഡ് സംസ്ഥാന സെക്രട്ടറി എം.മനോജ് ഉദ്ഘാടനം ചെയ്തു. സംസ്ഥാന ട്രഷറർ പി.ബി ഷാജി മുഖ്യപ്രഭാഷണം നടത്തി. ലെൻസ്‌ഫെഡ് ജില്ലാ സെക്രട്ടറി വസന്ത ശ്രീകുമാർ, ജില്ലാ ട്രഷറർ കുഞ്ഞുമോൻ കെങ്കിരേത്ത്, സംസ്ഥാന ജോയിന്റ് സെക്രട്ടറി കെ അലക്‌സാണ്ടർ, സംസ്ഥാന വൈസ്പ്രസിഡന്റ് കുര്യൻ ഫിലിപ്പ്, സംസ്ഥാന കമ്മിറ്റി അംഗം കെ.സുധീർ, ലെൻസ്‌ഫെഡ് മുൻ ജില്ലാ പ്രസിഡന്റ് ജി.അനൂപ് കുമാർ, മുൻ സെക്രട്ടറി എസ്.ശ്രീകുമാർ എന്നിവർ സംസാരിച്ചു. സമ്മേളനത്തിന്റെ ഭാഗമായി നൂതനവും വ്യത്യസ്തവുമായ നിർമ്മാണസാമഗ്രികളും വിവിധ നിർമ്മാണ രീതികളും സാങ്കേതിക വിദ്യകളും സേവനങ്ങളും പരിചയപ്പെടുത്തുന്ന പത്തോളം സ്റ്റാളുകളുടെ പ്രദർശനവും ഉണ്ടായിരുന്നു.