തിരുവല്ല: എസ്.എൻ.ഡി.പി.യോഗം തിരുവല്ല യൂണിയന്റെ ആഭിമുഖ്യത്തിലുള്ള ഗുരുഅരങ്ങ് ശ്രീനാരായണ കലോത്സവം സഹോദരൻ അയ്യപ്പൻ മേഖലാതല മത്സരങ്ങൾ ഇന്ന് ഇരവിപേരൂർ 1347 -ാം നമ്പർ ശാഖാ ഓഡിറ്റോറിയത്തിൽ നടക്കും. രാവിലെ 9ന് ഭദ്രദീപ പ്രകാശനം. തുടർന്ന് രജിസ്‌ട്രേഷൻ. 9.30ന് യൂണിയൻ പ്രസിഡന്റ് ബിജു ഇരവിപേരൂർ കലോത്സവം ഉദ്‌ഘാടനം ചെയ്യും. യൂണിയൻ സെക്രട്ടറി അനിൽ എസ്. ഉഴത്തിൽ അദ്ധ്യക്ഷത വഹിക്കും. എസ്.എൻ.ഡി.പി.യോഗം അസി.സെക്രട്ടറി പി.എസ്. വിജയൻ സംഘടനാ സന്ദേശം നൽകും. യോഗം ഇൻസ്‌പെക്ടിംഗ് ഓഫീസർ എസ്. രവീന്ദ്രൻ മുഖ്യപ്രഭാഷണം നടത്തും. യൂണിയൻ വൈസ് പ്രസിഡന്റ് കെ.ജി. ബിജു, കൗൺസിലർ മനോജ് ഗോപാൽ, ശാഖാ പ്രസിഡന്റ് വി.സി. സുബാഷ്, സെക്രട്ടറി സുരേന്ദ്രൻ എന്നിവർ സംസാരിക്കും. രാവിലെ 10 മുതൽ ഗുരുദേവ കൃതികളുടെ ആലാപനം, ഉപന്യാസം, പ്രസംഗം, കവിതാരചന, ക്വിസ്, ഗുരുദേവകൃതി വ്യാഖ്യാനം, മിമിക്രി, മോണോആക്ട്, പ്രച്ഛന്നവേഷം, ഒപ്പന, സിനിമാറ്റിക് ഡാൻസ് സിംഗിൾ, ഗ്രൂപ്പ്, ലളിതഗാനം, സംഘഗാനം, പദ്യപാരായണം, നൃത്താവിഷ്‌കാരം സിംഗിൾ, ഗ്രൂപ്പ് എന്നീ മത്സരങ്ങൾ നടക്കും. തിരുവല്ല ടൗൺ, ഇരവിപേരൂർ, ഓതറ, തൈമറവുംകര, നെല്ലിമല, കിഴക്കൻ ഓതറ, കുമാരനാശാൻ സ്മാരകം എന്നീ ശാഖകളിലെ കുട്ടികളാണ് കലാമത്സരങ്ങളിൽ പങ്കെടുക്കുക. കലോത്സവ നഗറിൽ സൗജന്യ നേത്ര പരിശോധന ഉണ്ടായിരിക്കും.