യേശുക്രിസ്തുവിന്റെ ജനനം ലോകം സംഗീത ആലപിച്ചാണ് ആഘോഷിച്ചതെന്ന് ബൈബിൾ പറയുന്നു, ആദ്യകാലത്ത് കരോൾ ഗാനങ്ങൾ ഭൂരിഭാഗവും ലാറ്റിൻ ഭാഷയിൽ ഉള്ളവയായിരുന്നു, 1223 ൽ സെന്റ് ഫ്രാൻസിസ് ഒഫ് അസീസിയാണ് സാധാരണ ജനങ്ങൾക്ക് മനസിലാകുന്ന വിധത്തിൽ ഗാനങ്ങൾ ചിട്ടപ്പെടുത്തി കരോൾ ഗാന ശാഖയ്ക്ക് പുത്തൻ ഉണർവ് നൽകിയത്.പതിനഞ്ചാം നൂറ്റാണ്ടിലാണ് കരോൾ ഗാനങ്ങൾക്ക് അന്താരാഷ്ട്ര തലത്തിൽ പ്രചാരം ലഭിക്കുന്നത്,പതിനാറാം നൂറ്റാണ്ടിലാണ് 12 ഡേയ്സ് ഒഫ് ക്രിസ്മസ് എന്ന ഗാനം പിറന്നത്,സൈലന്റ് നൈറ്റ്,ലിറ്റിൽ ടൗൺ ഒഫ് ബേത് ലഹേം എന്നിവയ്ക്ക് വിക്ടോറിയൻ കാലഘട്ടം സാക്ഷിയായി. സൈലന്റ് നൈറ്റ് ഹോളി നൈറ്റ് എന്ന ഗാനം നിരവധി ഭാഷയിലേക്ക് പരിഭാഷപ്പെടുത്തി, മലയാളത്തിൽ ഈ ഗാനം ശാന്ത രാത്രി തിരുരാത്രി എന്ന് തുടങ്ങുന്നതാണ്. തെരുവുകളിലും വീടുകളിലും പള്ളികളിലും ഒക്കെ ഗാനങ്ങൾ ആലപിച്ച് തുടങ്ങി.പിന്നീട് പണത്തിനും ഭക്ഷണത്തിനുമായി പാടുന്ന ഗായക സംഘങ്ങൾ ലോകത്ത് എല്ലായിടത്തും രൂപം കൊണ്ടു.ക്രിസ്മസ് സമ്മാനങ്ങളുമായി എത്തുന്ന സാന്താക്ലോസ് കൂടി കരോൾ സംഘങ്ങളുടെ ഭാഗമായതോടെ കരോൾ ഗാനങ്ങൾ സംഗീത സാന്ദ്രമായി. ക്രിസ്മസ് എന്ന വാക്കിന് തന്നെ ഒരു മാന്ത്രികത ഉണ്ടെന്ന് എഴുതിയത് ചാൾസ് ഡിക്കൻസ് എ ക്രിസ്തുമസ്കാരോൾ എന്ന ഗ്രന്ഥത്തിലാണ്.