അടൂർ : എസ്. എൻ. ഡി. പി യോഗം അടൂർ യൂണിയന്റെ നാലാമത് ശിവഗിരി തീർത്ഥാടന പദയാത്രയ്ക്ക് ഭക്തിനിർഭരമായ തുടക്കം. ഇന്നലെ രാവിലെ 7.30 ന് യൂണിയൻ പ്രാർത്ഥനാമന്ദിരത്തിൽ നടന്ന ചടങ്ങിൽ യൂണിയൻ ചെയർമാൻ അഡ്വ. എം. മനോജ് കുമാർ അദ്ധ്യക്ഷതവഹിച്ചു. പുനലൂർ യൂണിയൻ പ്രസിഡന്റ് ടി. കെ. സുന്ദരേശൻ പദയാത്ര ഉദ്ഘാടനം ചെയ്ത് പദയാത്ര ക്യാപ്റ്റനും യോഗം കൗൺസിലറുമായ എബിൻ ആമ്പാടിക്ക് പീതപതാക കൈമാറി. ഏറ്റവും മഹത്തും വിവിധ വിഷയങ്ങളിൽ അറിവ് കൈവരിക്കുന്നതിനുമായുള്ള മഹാതീർത്ഥാടനത്തിനാണ് ശ്രീനാരായണ ഗുരുദേവൻ അനുമതി കൽപ്പിച്ച് നൽകിയതെന്നും ഇത്രയും മഹത്തായ ഒരു തീർത്ഥാടനം മറ്റെവിടെയുമില്ലെന്നും അദ്ദേഹം പറഞ്ഞു. . യൂണിയൻ കൺവനീർ അഡ്വ. മണ്ണടി മോഹൻ സ്വാഗതം പറഞ്ഞു. സൈബർ സേന കേന്ദ്രസമിതിയംഗം അശ്വിൻ പ്രകാശ് സംസാരിച്ചു. . യൂത്ത്മൂവ്മെന്റ് യൂണിയൻ സെക്രട്ടറി സുജിത്ത് മണ്ണടി നന്ദിപറഞ്ഞു. യൂണിയൻ ആസ്ഥാനത്തെ ടി. കെ. മാധവ സൗധത്തിന് മുന്നിലെ പഞ്ചനില ഗുരുമന്ദിരത്തിന് മുന്നിൽ നിന്ന് പീതവസ്ത്രധാരികളായ വിവിധ ശാഖായോഗങ്ങളിൽ നിന്നുള്ള പ്രവർത്തകർ പദയാത്രയിൽ അണിനിരന്നു. ശ്രീനാരായണ മന്ത്രങ്ങൾ ഉരുവിട്ടുകൊണ്ട് നീങ്ങിയ പദയാത്ര വടക്കടത്തുകാവ് 316-ാം നമ്പർ ശാഖാഗുരുക്ഷേത്രം, പുതുശേരിഭാഗം ഗുരുമന്ദിരം, 2640-ാം നമ്പർ ഏനാത്ത് ശാഖ, 6090 ഏറത്ത് കുളക്കട ശാഖായോഗം, 1725 പെരുങ്കുളം ശാഖ, 2377 പള്ളിക്കൽ ശാഖ എന്നിവിടങ്ങളിലെ സ്വീകരണം ഏറ്റുവാങ്ങി വൈകിട്ട് 6.30 ന് കൊട്ടാരക്കര യൂണിയൻ ആസ്ഥാനത്ത് സമൂഹ പ്രാർത്ഥന, മംഗളാരതി എന്നിവയോടെ ഒന്നാം ദിവസം സമാപിച്ചു. ഇന്ന് വൈകിട്ട് ചാത്തന്നൂർ എസ്. എൻ. ഡി. പി യൂണിയൻ ആസ്ഥാനത്ത് സമാപിക്കുന്ന പദയാത്ര 30 ന് ഉച്ചയോടെ ശിവഗിരിയിലെത്തും..31 ന് ശിവഗിരി മഹാസമാധിയിൽ നിന്ന് പുറപ്പെടുന്ന മഹാഘോഷയാത്രയിൽ പദയാത്രികർ അണിചേരും.