തൊടിയൂർ: കരുനാഗപ്പള്ളി നിയോജക മണ്ഡലത്തിൽ കരുനാഗപ്പള്ളി - ശാസ്താംകോട്ട റോഡിൽ നിർമ്മിക്കുന്ന മാളിയേക്കൽ റെയിൽവെ മേൽപ്പാലത്തിന്റെ നിർമ്മാണം പുരോഗമിക്കുന്നു. ജില്ലാ കളക്ടർ ദേവി ദാസൻ നി‌ർമ്മാണ പുരോഗതി വിലയിരുത്താൻ സ്ഥലം സന്ദർശിച്ചു. സി.ആർ. മഹേഷ് എം.എൽ.എയും കളക്ടർക്കൊപ്പം ഉണ്ടായിരുന്നു. അടുത്ത മാർച്ചിൽ നിർമ്മാണം പൂർത്തിയാക്കി മേല്പാലം ഗതാഗതത്തിന് തുറന്നുകൊടുക്കുവാൻ കഴിയുമെന്ന് റെയിൽവേ അധികൃതർ എം.എൽ.എയെയും കളക്ടറെയും അറിയിച്ചു.

നിർത്തിവച്ചിരുന്ന പണികളും പുനരാരംഭിച്ചു

546 മീറ്റർ നീളത്തിലും 10.2 മീറ്റർ വീതിയിലും നിർമ്മിക്കുന്ന മേല്പാലത്തിന് റെയിൽവേ ഭാഗം ഒഴികെ 33 സ്പാനുകളിലായി 51 പൈലുകളും 13 പൈൽ ക്യാപ്പുകളും രണ്ട് അബട്ട്മന്റും ആണ് ഉള്ളത്. ഇവയെല്ലാം പൂർത്തീകരിച്ചിട്ടുണ്ട് . പിയർ ക്യാപ്പ് വരെയുള്ള ഭാഗം ആർ.ബി.ഡി.സി.കെ ആണ് നിർമ്മിച്ചിട്ടുള്ളത്. സൂപ്പർ സ്ട്രക്ചർ റെയിൽവേ നേരിട്ടാണ് നിർമ്മിക്കുന്നത് .ഇതിന്റെ പണികൾ നടന്നുവരുന്നു. റെയിൽവേ അഡ്ജസ്റ്റ് സ്പാൻ ഒഴികെ,എല്ലാ ഗാർഡറുകളുടെയും,ഡക്ക്സ്ലാബിന്റെയും പണികൾ പൂർത്തീകരിച്ചിട്ടുണ്ട്. റെയിൽവേ നിർദ്ദേശപ്രകാരം നിർത്തിവച്ചിരുന്ന സൈഡ് വാളിന്റെയും അഡ്ജസ്റ്റ് സ്പാനിന്റെയും പണികളും പുനരാരംഭിച്ചിട്ടുണ്ട്.

സ്റ്റീൽ കോൺക്രീറ്റ് കോമ്പോസിറ്റ് രീതി

കേരളത്തിൽ ആദ്യമായി പൂർണമായും സ്റ്റീൽ കോൺക്രീറ്റ് കോമ്പോസിറ്റ് രീതിയിൽ നിർമ്മിക്കുന്ന 10 മേൽപ്പാലങ്ങളിൽ ഒന്നാണ് മാളിയേക്കൽ റെയിൽവേ മേൽപ്പാലം. ഇതിന്റെ പൈൽ,പൈൽ ക്യാപ്പ്,ഡക്ക് സ്ലാബ്എന്നിവ കോൺക്രീറ്റിലും, പിയർ, പിയർക്യാപ്പ്, ഗാർഡറുകൾ എന്നിവ സ്റ്റീലിലും ആണ് നിർമ്മിച്ചിരിക്കുന്നത്. കേരള റെയിൽവേ ബ്രിഡ്ജസ് ഡെവലപ്മെന്റ് കോർപ്പറേഷൻ പ്രതിനിധികളും കളക്ടറൊടൊപ്പം ഉണ്ടായിരുന്നു.