ചാത്തന്നൂർ: എസ്.എൻ.ഡി.പി. യോഗം ചാത്തന്നൂർ യൂണിയന്റെ നേതൃത്വത്തിൽ 91-ാ മത് ശിവഗിരി തീർത്ഥാടനത്തോട് അനുബന്ധിച്ചു സംഘടിപ്പിച്ചിട്ടുള്ള പദയാത്ര സംഘങ്ങളുടെ സ്വീകരണം, ഭക്ഷണം, താമസ സൗകര്യം എന്നിവയുടെ ക്രമീകരണങ്ങൾ പൂർത്തിയായി. 29,30,31 ദിവസങ്ങളിലാണ് പദയാത്രികർ ചാത്തന്നൂരിൽ വിശ്രമിക്കുന്നത്.

മൂന്നു നേരത്തെ ഭക്ഷണം യൂണിയന്റെ നേതൃത്വത്തിലാണ് നൽകുന്നത്. ചാത്തന്നൂർ ശ്രീ നാരായണ കോളേജ്, എസ്.എൻ.ടി എച്ച്.എസ്.എസ്, ഏറം ശാഖാമന്ദിരം എന്നിവിടങ്ങളിലാണ് താമസ സൗകര്യം. ചങ്ങനാശ്ശേരി, വാകത്താനം, കുമരകം, തുരുത്തി, കായംകുളം, ചേപ്പാട്, ഗുഹാനന്ദപുരം, പുളിക്കുറുശ്ശേരി, തിരുവല്ല, കുട്ടനാട് എന്നിവിടങ്ങളിൽ നിന്നുള്ള പദയാത്രികരാണ് ചാത്തന്നൂരിൽ വിശ്രമിക്കുന്നത്. ചാത്തന്നൂർ യൂണിയന്റെയും പാരിപ്പള്ളി മേഖലയിലെ ശാഖകളുടെയും ആഭിമുഖ്യത്തിൽ രൂപീകരിച്ച പദയാത്ര സമിതിയുടെ നേതൃത്വത്തിൽ കിഴക്കൻ മേഖലയിൽ നിന്നുള്ള പദയാത്രികർക്ക് എല്ലാ സൗകര്യവും പാരിപ്പള്ളി അമൃത ഹയർ സെക്കൻഡറി സ്കൂളിൽ ഒരുക്കിയിട്ടുണ്ട്. പിറവം, കോട്ടയം, പള്ളം, പത്തനംതിട്ട എന്നിവിടങ്ങളിൽ നിന്നുള്ള രഥ ഘോഷയാത്ര, യുവജന പദയാത്ര സമിതി, കുട്ടനാട്ടിൽ നിന്നുള്ളവർ എന്നിവർക്ക് പരിപ്പള്ളിയിൽ സ്വീകരണം ഭക്ഷണം, വിശ്രമംം താമസ സൗകര്യം എന്നിവ ഒരുക്കിയിട്ടുണ്ട്.

ചാത്തന്നൂർ, പാരിപ്പള്ളി, തഴുത്തല, മൈലക്കാട്, കുമ്മല്ലൂർ, കാരംകോട്, കണ്ണേറ്റ, കല്ലുവാതുക്കൽ എന്നീ ശാഖകൾ പദയാത്രികർക്ക് സ്വീകരണവും ലഘു ഭക്ഷണവും നൽകും. പുത്തൂർ വഴി കടന്നുപോകുന്ന പദയാത്രികർക്ക് നെടുങ്ങോലം, പൂക്കുളം, അരുണോദയം, ഒല്ലാൽ, പുറ്റിങ്ങൽ, കോട്ടപ്പുറം, പൊഴിക്കര എന്നിവിടങ്ങളിൽ സ്വീകരണവും ഭക്ഷണം, താമസ സൗകര്യവും നൽകും. കിഴക്കൻ മേഖലയിൽ നിന്നു ഓയൂർ വഴി വരുന്ന പദ യാത്രികർക്ക് വിലവൂർ കോണം, വേളമാനൂർ ശാഖകളുടെ ആഭിമുഖ്യത്തിൽ വേളമാനൂർ ജംഗ്ഷനിൽ നിന്നു സ്വീകരിച്ചു ഗുരുക്ഷേത്രത്തിലേക്ക് നയിക്കും. ഉച്ച ഭക്ഷണത്തിനു ശേഷം പുറപ്പെടുന്ന പദയാത്രയ്ക്ക് കുളമട, 805 പാരിപ്പള്ളി ശാഖകളുടെ സ്വീകരണത്തിന് ശേഷം പാരിപ്പള്ളിയിൽ വിശ്രമിക്കും. ഇവിടെ പൊതുസമ്മേളനം ഉണ്ടായിരിക്കുമെന്നും യൂണിയൻ പ്രസിഡന്റ്‌ ബി.ബി. ഗോപകുമാർ, സെക്രട്ടറി കെ. വിജയകുമാർ എന്നിവർ അറിയിച്ചു.