 എല്ലാ ശാഖകൾക്കും ഓഫീസും ഗുരുമന്ദിരങ്ങളും വേണം

കൊല്ലം: എസ്.എൻ.ഡി.പി യോഗം ശാഖാ ഭാരവാഹികൾക്കും യോഗത്തിന്റെയും ട്രസ്റ്റിന്റെയും ഡയറക്ടർ ബോർഡ് അംഗങ്ങൾക്കും എപ്പോഴും തന്നെ വിളിക്കാമെന്നും താൻ വിളിപ്പുറത്തുണ്ടാകുമെന്നും യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു.

എസ്.എൻ ട്രസ്റ്റ് കൊല്ലം റീജിയൺ തിര‌ഞ്ഞെടുപ്പിൽ തന്റെ നേതൃത്വത്തിലുള്ള ഔദ്യോഗിക പാനലിന് ഉജ്ജ്വല വിജയം സമ്മാനിക്കാൻ ആത്മാർത്ഥമായി പരിശ്രമിച്ചവർക്ക് നന്ദി പ്രകാശിപ്പിക്കാൻ യോഗം ആസ്ഥാനത്തെ ധ്യാന മന്ദിരത്തിൽ സംഘടിപ്പിച്ച സ്നേഹ സംഗമം ഉദ്ഘാടനം ചെയ്യുകയായിരുന്നു അദ്ദേഹം.

ശാഖ പ്രസിഡന്റ്, സെക്രട്ടറി, യോഗം, ട്രസ്റ്റ് ഡയറക്ടർ ബോർഡ് അംഗങ്ങൾ എന്നിവരുടെ മക്കൾക്ക് ശ്രീനാരായണ സ്ഥാപനങ്ങളിൽ പ്രവേശനത്തിന് തന്നെ നേരിട്ട് വിളിക്കാം. എന്നാൽ പരിമിതമായ സീറ്റേ മാനേജ്മെന്റ് ക്വാട്ടയായുള്ളു എന്ന ബോദ്ധ്യമുണ്ടാകണം. ശാഖ ഭാരവാഹികളും പ്രവർത്തകരുമാണ് യോഗം നേതൃത്വത്തെ സൃഷ്ടിക്കുന്നത്. തന്നെ നേതാവാക്കിയത് ശാഖ പ്രവർത്തകരാണെന്ന ഉത്തമബോദ്ധ്യം തനിക്കുണ്ട്. യോഗത്തിന്റെ ആസ്ഥാനം സ്ഥിതി ചെയ്യുന്ന കൊല്ലത്തെ പല ശാഖകൾക്കും ഓഫീസുകളില്ല. പല ശാഖകളിലും ഗുരുമന്ദിരങ്ങളില്ല. ഈ സ്ഥിതി മാറ്റി എല്ലാ ശാഖകൾക്കും ഓഫീസുകളും ഗുരുമന്ദിരങ്ങളും ഉണ്ടാകണം. അതിന് തന്റെ എല്ലാ സഹായങ്ങളും ഉണ്ടാകും.

താൻ എസ്.എൻ ട്രസ്റ്റിന്റെയും യോഗത്തിന്റെയും സെക്രട്ടറിയായതിന് മുമ്പും ശേഷവുമുള്ള കാര്യങ്ങൾ പരിശോധിക്കണം. ലാ കോളേജും നഴ്സിംഗ് കോളേജും ഹയർ സെക്കൻഡറി സ്കൂളും സി.ബി.എസ്.ഇ സ്കൂളും ഷോപ്പിംഗ് കോംപ്ലക്സും എസ്.എൻ ട്രസ്റ്റിന്റെ ആസ്ഥാന മന്ദിരവും താൻ സെക്രട്ടറിയായ ശേഷം സ്ഥാപിച്ചതാണ്. കൊല്ലം എസ്.എൻ കോളേജിലും വനിതാ കോളേജിലും യോഗം ആസ്ഥാനത്തും ഉണ്ടായ മാറ്റങ്ങളും പകൽ പോലെ വ്യക്തമാണ്. എന്നിട്ടും കുപ്രചരണങ്ങൾ നടത്തുകയാണ്. ഇക്കഴിഞ്ഞ എസ്.എൻ ട്രസ്റ്റ് തിരഞ്ഞെടുപ്പിൽ കൊല്ലത്ത് മാത്രമാണ് മത്സരം ഉണ്ടായിരുന്നത്. അതിന്റെ ചെലവിനായി ട്രസ്റ്റിന് 50 ലക്ഷം രൂപയാണ് നഷ്ടമായത്. സമുദായാംഗങ്ങൾക്ക് നയാപൈസയുടെ സഹായം ചെയ്യാത്തവരാണ് നിലവിലെ നേതൃത്വത്തിനെതിരെ കുപ്രചരണം നടത്തുന്നതെന്നും വെള്ളാപ്പള്ളി പറഞ്ഞു.

കൊല്ലം യൂണിയൻ പ്രസിഡന്റ് മോഹൻ ശങ്കർ അദ്ധ്യക്ഷനായി. യോഗം വൈസ് പ്രസിഡന്റ് തുഷാർ വെള്ളാപ്പള്ളി, എസ്.എൻ ട്രസ്റ്റ് ട്രഷറർ ഡോ. ജി.ജയദേവൻ, കൊല്ലം യൂണിയൻ സെക്രട്ടറി എൻ. രാജേന്ദ്രൻ, യോഗം കൗൺസിലർ പി.സുന്ദരൻ, ചാത്തന്നൂർ യൂണിയൻ പ്രസിഡന്റ് ബി.ബി.ഗോപകുമാർ, സെക്രട്ടറി കെ.വിജയകുമാർ, കുണ്ടറ യൂണിയൻ സെക്രട്ടറി അഡ്വ. എസ്.അനിൽകുമാർ, തിരഞ്ഞെടുപ്പ് പ്രവർത്തനം ഏകോപിപ്പിക്കാൻ കോ- ഓർഡിനേറ്റർമാരായി വിവിധ ഭാഗങ്ങളിൽ നിന്നെത്തിയ യോഗം നേതാക്കൾ തുടങ്ങിയവർ സംസാരിച്ചു.

യോഗം ശാഖ ഭാരവാഹികൾ, എസ്.എൻ ട്രസ്റ്റ് ഡയറക്ടർ ബോർഡ് അംഗങ്ങൾ, യൂണിയൻ ഭാരവാഹികൾ, പോഷക സംഘടനാ ഭാരവാഹികൾ തുടങ്ങിയവർ പങ്കെടുത്തു.