കൊട്ടാരക്കര : 91ാമത് ശിവഗിരി തീർത്ഥാടനത്തോടനുബന്ധിച്ച് നാഗമ്പടം ശിവഗിരി തീർത്ഥാടന പദയാത്രാ പള്ളം സമിതിയുടെ ആഭിമുഖ്യത്തിൽ 25ന് നാഗമ്പടം മഹാദേവ ക്ഷേത്രത്തിലെ തേന്മാവിൽ ചുവട്ടിൽ നിന്ന് മന്ത്രി കെ.എൻ. വാസവൻ ഉദ്ഘാടനം ചെയ്ത പദയാത്രാ സംഘത്തിന് എസ്.എൻ.ഡി.പി യോഗം കൊട്ടാരക്കര യൂണിയന്റെയും ശാഖാ യോഗങ്ങളുടെയും പോഷക സംഘടനകളുടെയും നേതൃത്വത്തിൽ സ്വീകരണം നൽകി. യൂണിയൻ അതിർത്തിയായ കുളക്കട പുത്തൂർ മുക്കിൽ എത്തിയ ജാഥയെ യൂണിയൻ ഭാരവാഹികൾ ഹാരാർപ്പണം നടത്തി സ്വീകരിച്ചു. യൂണിയൻ സെക്രട്ടറി അഡ്വ. പി. അരുൾ , മുൻ സെക്രട്ടറി ജി.വിശ്വംഭരൻ എന്നിവർ തീർത്ഥാടക രഥത്തിലെ ഗുരുദേവ വിഗ്രഹത്തിൽ ഹാരാർപ്പണം നടത്തി. യൂണിയൻ കൗൺസിൽ അംഗം അഡ്വ.എൻ.രവീന്ദ്രൻ, ജാഥാ ക്യാപ്ടൻ കെ.കെ. വിജയകുമാറിനും അനിൽ ആനക്കോട്ടൂർ ജാഥാ കമ്മിറ്റിസെക്രട്ടറി ജി.സാജനും ഹാരാർപ്പണം നടത്തി. കൗൺസിൽ അംഗങ്ങളായ കുടവട്ടൂർ രാധാകൃഷ്ണൻ, ബൈജു പാണയം, അംബുജാക്ഷൻ, സുദേവൻ, ,ഹരൻകുമാർ, താഴത്തു കുളക്കട ശാഖാ പ്രസി‌ഡന്റ് വിശ്വനാഥൻ, സെക്രട്ടറി രാധാകൃഷ്ണൻ തുടങ്ങിയവർ നേതൃത്വം നൽകി. തുടർന്ന് പദയാത്രാ സംഘം പൂവറ്റൂർ ടൗൺ,പൂവറ്റൂർ തച്ചൻമുക്ക്, വെണ്ടാർ, കോട്ടാത്തല ശാഖാ യോഗങ്ങളുടെ സ്വീകരണത്തിന് ശേഷം കോട്ടാത്തലയിൽ വിശ്രമിച്ചു. ഇന്ന് രാവിലെ പുറപ്പെട്ട് കൊട്ടാരക്കര ടൗൺ, നീലേശ്വരം, കാക്കക്കോട്ടൂർ, ഇടയ്ക്കിടം, കടയ്ക്കോട്പടിഞ്ഞാറ്റിൻകര, കടക്കോട് , മാരൂർ, കുടവട്ടൂർ, കട്ടയിൽ, ഓടനാവട്ടം, വിലങ്ങറ, ചെപ്ര,തുറവൂർ, കളപ്പില, വെളിയം സെൻട്രൽ ശാഖകളുടെ സ്വീകരണം ഏറ്റുവാങ്ങി വെളിയം സെൻട്രൽ ശാഖയിൽ വിശ്രമിക്കും. തുടർന്ന് 30ന് രാവിലെ ഓയൂർ,കരിങ്ങന്നൂർ, പുത്തൻവിള, മോട്ടോർകുന്ന്, പുതുശ്ശേരി തുടങ്ങിയ ശാഖകളിലെ സ്വീകരണങ്ങൾ ഏറ്റുവാങ്ങും. തുടർന്ന് ജാഥ തിരുവനന്തപുരം ജില്ലയിൽ പ്രവേശിക്കും.