മാള: ചരിത്ര പ്രസിദ്ധവും വാസ്തുവിദ്യാ വൈഭവമുള്ള ഐരാണിക്കുളം മഹാദേവക്ഷേത്രത്തിൽ മുസിരീസ് പൈതൃക ഫണ്ട് ഉപയോഗിച്ച് മൂന്ന് കോടിയോളം രൂപ ചെലവിൽ നടത്തിയ പുനരുദ്ധാരണ പ്രവർത്തനങ്ങൾ പൂർത്തിയായി. മോടി കൂട്ടിയ ക്ഷേത്രത്തിലെ തിരുവാതിര മഹോത്സവത്തിന് 20ന് കൊടിയേറും. കേരളത്തിൽ പരശുരാമൻ സ്ഥാപിച്ച 64 ഗ്രാമക്ഷേത്രങ്ങളിൽ ഒന്നും പഞ്ചൈശ്വര പ്രസിദ്ധമായതും ഇരുനില വട്ട ശ്രീകോവിലുള്ളതും ശിവ, പാർവതി, സുബ്രഹ്മണ്യ വിഗ്രഹങ്ങൾ ഒരുമിച്ച് ഒരു പീഠത്തിൽ പ്രതിഷ്ഠിച്ചിരിക്കുന്ന അപൂർവ പ്രതിഷ്ഠയുള്ള പുരാതന ക്ഷേത്രമാണിത്. ഒട്ടുംതന്നെ സിമന്റ് ഉപയോഗിക്കാതെ തികച്ചും പൈതൃക രീതിയിലാണ് പുനരുദ്ധാരണ പ്രവർത്തനങ്ങൾ പൂർത്തിയാക്കിയത്. നിർമ്മാണ പ്രവർത്തനങ്ങളുടെ മേൽനോട്ടം നിർവഹിച്ചത് ഇൻങ്കലാണ്. കരാർ പ്രകാരമുള്ള നിർമ്മാണ പ്രവൃത്തികൾ നടത്തിയത് തിരുവനന്തപുരത്തെ ഹൈ ഇലകറ്റ് എന്റർപ്രൈസസാണ്. ആഞ്ഞിലിത്തടിയിൽ തീർത്ത മരപ്പണികളിലെല്ലാം സവിശേഷമായ അഷ്ടക്കൂട്ട് അടിച്ചിട്ടുണ്ട്. ആറ്റുമണലും ഖനനം ചെയ്‌തെടുത്ത കുമ്മായവും കടുക്കയും വെള്ളവും ശർക്കരയും പ്രത്യേക അനുപാതത്തിൽ വലിയ ഗ്രൈൻഡറിലിട്ട് അരച്ചെടുത്തതാണ് ചുമരുകൾ തേച്ചത്.

പൂർത്തിയാക്കിയ പ്രധാന പുനരുദ്ധാരണ പ്രവർത്തനങ്ങൾ

• നന്ദിയുടെ കരിങ്കൽ പ്രതിമ പുനസ്ഥാപിച്ചു.
• നമസ്‌കാര മണ്ഡപം പുതുതായി നിർമ്മിച്ച് അതിൽ ക്ഷേത്രത്തിലുണ്ടായിരുന്ന രണ്ട് പുരാണ ശിലാ ലിഖിതങ്ങളും നന്ദിയുടെ പ്രതിമയും സ്ഥാപിച്ചു.
• നൃത്ത മണ്ഡപം പണിത് നാലുവശങ്ങളിലും മനോഹരമായ സോപാനപ്പടികൾ നിർമ്മിച്ചു.
• തെക്കേടത്ത് ക്ഷേത്രത്തിന്റെ വട്ട ശ്രീകോവിലിന്റെ മുകൾത്തട്ട് ആഞ്ഞലിത്തടിയിൽ പുനർനിർമ്മിച്ച് ബലപ്പെടുത്തി.
• മുംബൈയിൽ നിന്നും കൊണ്ടുവന്ന ചെമ്പ് ഷീറ്റുകൾ ക്ഷേത്രത്തിൽ വിദഗ്ദ്ധരായ ശിൽപ്പികൾ മുറിച്ച് മടക്കി തകിടുകളാക്കി വട്ട ശ്രീകോവിലിന്റെ അടിയിലും മുകളിലും ചെമ്പ് വിരിച്ചു.
• ചെമ്പ് തകിടുകളിൽ മെറ്റാലിക് കോപ്പർ രണ്ട് പ്രാവശ്യം അടിച്ചു. ശ്രീകോവിലിന്റെ ചുമരുകളിൽ ചിത്രപ്പണികളോടെ തൂവാനം പിടിപ്പിച്ചു.
• ദ്വാരപാലകന്മാരെ പുനർനിർമ്മിച്ചു.
• വട്ട ശ്രീകോവിലിന്റെ ചുമരിലുണ്ടായിരുന്ന ആനകളുടെ രൂപങ്ങൾ പുനർനിർമ്മിച്ചു.
• നാട്ടുകാരുടെ സഹായത്തോടെ സ്വർണം പൂശിയ താഴികക്കുടം ക്ഷേത്രത്തിൽ മാസങ്ങൾക്ക് മുമ്പേ സ്ഥാപിച്ചു.
• ഗണപതി ക്ഷേത്രത്തിന്റെ നവീകരണം പൂർത്തിയാക്കി.