കൊടുങ്ങല്ലൂർ: യൂത്ത് കോൺഗ്രസ്, കെ.എസ്.യു പ്രവർത്തകർക്കെതിരെ അകാരണമായി കേസെടുക്കുകയും ക്രൂരമായി മർദ്ദിക്കുകയും ചെയ്യുന്ന പൊലീസ്, ഡി.വൈ.എഫ്.ഐ നടപടിക്കെതിരെ കോൺഗ്രസ് പ്രവർത്തകർ കൊടുങ്ങല്ലൂരിൽ പൊലീസ് സ്റ്റേഷൻ മാർച്ച് നടത്തി. കൊടുങ്ങല്ലൂർ, എറിയാട് ബ്ലോക്ക് കമ്മിറ്റികളുടെ നേതൃത്വത്തിൽ ചന്തപ്പുര ബസ് സ്റ്റാൻഡ് പരിസരത്ത് നിന്ന് ആരംഭിച്ച മാർച്ച് സ്റ്റേഷന് നൂറ് മീറ്റർ അകലെ പൊലീസ് ബാരിക്കേഡ് വച്ച് തടഞ്ഞു. ബാരിക്കേഡ് തള്ളി നീക്കാൻ പ്രവർത്തകർ ശ്രമിച്ചത് ചെറിയ സംഘർഷത്തിനിടയാക്കി. തുടർന്ന് നടന്ന പ്രതിഷേധ യോഗം ഡി.സി.സി ജനറൽ സെക്രട്ടറി ടി.എം. നാസർ ഉദ്ഘാടനം ചെയ്തു. കൊടുങ്ങല്ലൂർ ബ്ലോക്ക് കോൺഗ്രസ് പ്രസിഡന്റ് ഇ.എസ്. സാബു അദ്ധ്യക്ഷനായി. ജില്ലാ സെക്രട്ടറി അഡ്വ. വി.എം. മൊഹിയുദ്ദീൻ, എറിയാട് ബ്ലോക്ക് പ്രസിഡന്റ് സി.എം. മൊയ്തു, പി.എസ്. മുജീബ് റഹ്മാൻ, വി.എം. ജോണി, പി.എ. മനാഫ്, പി.കെ. മുഹമ്മദ്, ടി.എം. കുഞ്ഞുമൊയ്തീൻ, എം.പി. സോണി, അയൂബ് കരൂപ്പടന്ന, ഇ.എസ്. മുഹമ്മദ് സഗീർ, കെ.എം. സാദത്ത്, ജോസഫ് ദേവസി, നിഷാഫ് കുര്യാപ്പിളളി, കെ.പി. സുനിൽകുമാർ എന്നിവർ പ്രസംഗിച്ചു.