തൃശൂർ: പുതുവത്സരാഘോഷം അതിരുകടക്കാതിരിക്കാൻ കനത്ത ജാഗ്രത ഉറപ്പാക്കിയ പൊലീസ്, 600 ഉദ്യോഗസ്ഥരെ അധികമായി വിന്യസിച്ചു. ഷാഡോ പൊലീസിന്റെ സേവനവും ഉപയോഗപ്പെടുത്തും. ന്യൂ ഇയർ പാർട്ടികളിൽ മയക്കുമരുന്ന് വിൽപ്പനയും ഉപയോഗവും കണ്ടെത്താനാണ് ഷാഡോ പൊലീസിനെ നിയോഗിക്കുക. പുതുവത്സരാഘോഷത്തിന്റെ മറവിൽ അക്രമം, പിടിച്ചുപറി, സ്ത്രീകൾക്കും കുട്ടികൾക്കുമെതിരെയുള്ള അതിക്രമം എന്നിവ തടയാൻ പ്രത്യേക പദ്ധതിയും തയ്യാറാക്കി.
അനധികൃത മദ്യവിൽപ്പന, മയക്കുമരുന്ന് ഉപയോഗം, പൊതുസ്ഥലത്തെ മദ്യപാനം എന്നിവയ്‌ക്കെതിരെ കർശന നിയമനടപടിയുണ്ടാകും. അനുമതി വാങ്ങാതെയും, ശബ്ദപരിധി ലംഘിച്ചുമുള്ള ഉച്ചഭാഷിണി ഉപയോഗത്തിനെതിരെയും നടപടിയെടുക്കും. ബാറുകളിലും മറ്റ് മദ്യവിൽപ്പനശാലകളിലും സമയപരിധിക്ക് ശേഷമുള്ള മദ്യവിൽപന അനുവദിക്കില്ല. വ്യാജമദ്യം, വ്യാജകള്ള് എന്നിവയുടെ വിൽപ്പന കണ്ടെത്താൻ ബാറുകളിൽ നിന്നും കള്ളുഷാപ്പുകളിൽ നിന്നും സാമ്പിൾ ശേഖരിച്ച് പരിശോധിക്കും. നഗരത്തിലും പരിസരപ്രദേശങ്ങളിലും പ്രത്യേക മേഖലകൾ തിരിച്ചാണ് പട്രോളിംഗ് സംഘത്തെ നിയോഗിച്ചിട്ടുള്ളത്.
500 ലേറെ ക്യാമറ
ജില്ലയിലേക്ക് പ്രവേശിക്കുന്നതും പുറത്തുപോകുന്നതുമായ എല്ലാ വാഹനങ്ങളും നിരീക്ഷിക്കുന്നതിന് ക്യാമറ സംവിധാനം ശക്തമാക്കി. തൃശൂർ നഗരത്തിന്റെ വിവിധ ഭാഗങ്ങളിലും റെയിൽവേ സ്റ്റേഷൻ, ബസ് സ്റ്റാൻഡ് എന്നിവിടങ്ങളിലായി സ്ഥാപിച്ചിരിക്കുന്ന 500ൽ അധികം സി.സി.ടി.വി ക്യാമറകൾ പകർത്തുന്ന ദൃശ്യങ്ങൾ തത്സമയം നിരീക്ഷിക്കാനുള്ള സംവിധാനം പൊലീസ് കൺട്രോൾ റൂമിൽ സജ്ജമാക്കി.
ശ്രദ്ധിക്കാൻ
രാത്രിസമയത്ത് വീടുപൂട്ടി പ്രാർത്ഥനാ ചടങ്ങിലും ആഘോഷ പരിപാടികളിലും പങ്കെടുക്കാൻ പോകുന്നവർ വീടിനകത്ത് സൂക്ഷിച്ചിരിക്കുന്ന പണത്തിന്റെയും സ്വർണാഭരണങ്ങളുടെയും സുരക്ഷിതത്വം ഉറപ്പാക്കണം. പള്ളികളിലും ആരാധനാലയങ്ങളിലും രാത്രി പ്രാർത്ഥനാ ചടങ്ങുകളിൽ പങ്കെടുക്കാനെത്തുന്ന സ്ത്രീകളും കുട്ടികളും അടക്കമുള്ളവരുടെ സംരക്ഷണം ഉറപ്പുവരുത്തും.
കുടിച്ച് ഓടിച്ചാൽ കുടുങ്ങും
മദ്യപിച്ച് വാഹനമോടിക്കുന്നവരെ കണ്ടെത്താൻ പ്രത്യേക പരിശോധന
എല്ലാ റോഡിലും വാഹന പരിശോധന
റോഡ് നിയമം ലംഘിക്കുന്നവർക്കെതിരെ കർശന നടപടി
അനുവദനീയമല്ലാത്ത പടക്കങ്ങളും വെടിക്കോപ്പും ഉപയോഗിക്കരുത്
മയക്കുമരുന്ന് ഉൾപ്പെടെയുള്ള അനധികൃത ലഹരിവിൽപ്പന, അറിയിക്കേണ്ട നമ്പർ: 9497927797.
ഇമെയിൽ: pgcelladgplo.pol@kerala.gov.in
അടിയന്തര സഹായത്തിന്: 112.
സിറ്റി പൊലീസ് അറിയിപ്പിന് : https://www.facebook.com/thrissurctiypolice
ട്രെയിൻ യാത്രയും സുരക്ഷിതമാക്കാം
ട്രെയിൻ യാത്രയ്ക്കിടയിൽ എന്തെങ്കിലും പ്രശ്‌നമുണ്ടായാൽ 24 മണിക്കൂറും പ്രവർത്തിക്കുന്ന റയിൽവേ പൊലീസ് കൺട്രോൾ റൂമിൽ വിവരം അറിയിക്കാം. 9497935859 എന്ന വാട്‌സ്ആപ് നമ്പറിൽ ഫോട്ടോ, വീഡിയോ, ടെക്സ്റ്റ് എന്നിവയായും വിവരങ്ങൾ കൈമാറാം