പാനൂർ: ജില്ലാ എൻഫോഴ്സ്‌മെന്റ് സ്‌ക്വാഡ് നടത്തിയ മിന്നൽ പരിശോധനയിൽ പാനൂർ നഗരസഭയിലെ രണ്ട് സ്ഥാപനങ്ങളുടെ ഗോഡൗണിൽ നിന്നും നിരോധിത ഒ​റ്റത്തവണ ഉപയോഗ വസ്തുക്കളുടെ വൻ ശേഖരം പിടികൂടി. പോപ്പുലർ ട്രേഡേഴ്സ്, ബെസ്​റ്റ് ട്രേഡേഴ്സ് എന്നീ സ്ഥാപനങ്ങളുടെ ഗോഡൗണുകളിൽ നിന്നാണ് അഞ്ച് ക്വിന്റലിലധികം നിരോധിത ഉത്പന്നങ്ങൾ പിടികൂടിയത്. രണ്ട് സ്ഥാപനങ്ങൾക്കും പതിനായിരം രൂപ വീതം പിഴ ചുമത്തി. ജില്ലാ എൻഫോഴ്സ്‌മെന്റ് സ്‌ക്വാഡ് ലീഡർ ഇ.പി.സുധീഷ്, എൻഫോഴ്സ്‌മെന്റ് ഓഫീസർ കെ.ആർ അജയകുമാർ, ടീമംഗം ഷെറീകുൾ അൻസാർ എന്നിവരോടൊപ്പം പാനൂർ നഗരസഭാ സെക്രട്ടറി എ. പ്രവീൺ, പബ്ലിക് ഹെൽത്ത് ഇൻസ്‌പെക്ടർമാരായ കെ.മധു., എ.കെ പ്രീജ, ഒ.എ ഷാമിൽ മുസ്തഫ എന്നിവരും റെയ്ഡിൽ പങ്കെടുത്തു.