തിരുവനന്തപുരം: തീരദേശത്തെ സ്ത്രീകളുടെ പ്രശ്നങ്ങൾ നേരിട്ടറിയാൻ വനിതാ കമ്മിഷന്റെ തീരദേശ ക്യാമ്പ് ഇന്ന് അഞ്ചുതെങ്ങിലും നാളെ കഠിനംകുളത്തും നടക്കും. അഞ്ചുതെങ്ങിലെ മത്സ്യത്തൊഴിലാളികളുടെ വീടുകൾ ഇന്ന് രാവിലെ 9ന് വനിതാകമ്മിഷൻ സന്ദർശിക്കും. രാവിലെ 11ന് അഞ്ചുതെങ്ങ് പഞ്ചായത്ത് ഹാളിൽ നടക്കുന്ന ഏകോപനയോഗം അദ്ധ്യക്ഷ അഡ്വ.പി.സതീദേവി ഉദ്ഘാടനം ചെയ്യും.അഞ്ചുതെങ്ങ് ഗ്രാമപഞ്ചായത്ത് പ്രസിഡന്റ് വി.ലൈജു അദ്ധ്യക്ഷത വഹിക്കും. കമ്മിഷൻ അംഗങ്ങളായ അഡ്വ.ഇന്ദിരാ രവീന്ദ്രൻ, വി.ആർ.മഹിളാമണി, അഡ്വ.പി.കുഞ്ഞായിഷ, അഡ്വ.എലിസബത്ത് മാമ്മൻ മത്തായി, മെമ്പർ സെക്രട്ടറി സോണിയ വാഷിംഗ്ടൺ, ഡയറക്ടർ ഷാജി സുഗുണൻ, പ്രോജക്ട് ഓഫീസർ എൻ.ദിവ്യ, ഗ്രാമപഞ്ചായത്ത് വൈസ് പ്രസിഡന്റ് ലിജ ബോസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഫ്ളോറൻസ് ജോൺസൺ തുടങ്ങിയവർ സംസാരിക്കും. സ്ത്രീകളുടെ പ്രശ്നങ്ങൾ സംബന്ധിച്ച ചർച്ച കമ്മിഷൻ റിസർച്ച് ഓഫീസർ എ.ആർ.അർച്ചന നയിക്കും.7ന് രാവിലെ 10 മുതൽ കഠിനംകുളം അവർലേഡി ഒഫ് അസംപ്ഷൻ ചർച്ച് ഹാളിൽ ഗാർഹികാതിക്രമങ്ങളും പരിഹാരവുമെന്ന വിഷയത്തിൽ സെമിനാർ അഡ്വ.പി.സതീദേവി ഉദ്ഘാടനം ചെയ്യും. പഞ്ചായത്ത് പ്രസിഡന്റ് അജിത അനി അദ്ധ്യക്ഷത വഹിക്കും.