തിരുവനന്തപുരം: കസ്റ്റംസ് ഉദ്യോഗസ്ഥൻ ചമഞ്ഞ് ചാർട്ടേഡ് അക്കൗണ്ടന്റിൽ നിന്ന് 2.25 കോടി രൂപ തട്ടിയ സംഭവത്തിൽ രാജസ്ഥാനിൽ നിന്ന് പിടികൂടിയ നാലുപേരെ സിറ്റി സൈബർ പൊലീസ് ഇന്ന് കേരളത്തിലെത്തിക്കും. രാജസ്ഥാൻ സ്വദേശികളായ അനിൽ സഞ്ചതി,വിജയകുമാർ ശർമ്മ,രാഹുൽ ശർമ്മ,വിനോദ് കുമാർ ശ്രീവാസ് എന്നിവരാണ് പ്രതികൾ.

പുലർച്ചെ ട്രെയിൻ മാർഗം സിറ്റി സൈബർ പൊലീസ് സ്റ്റേഷനിൽ പ്രതികളായ നാലുപേരെ എത്തിക്കും. നടപടികൾ പൂർത്തിയാക്കി ഇന്ന് ഉച്ചയോടെ പ്രതികളെ റിമാൻഡ് ചെയ്യും. എസ്.എച്ച്.ഒ വിനോദ്കുമാറിന്റെ നേതൃത്വത്തിലുള്ള സംഘമാണ് പ്രതികളെ അതിവിദഗ്ദ്ധമായി പിടികൂടിയത്.

പിടിയിലായവരെക്കൂടാതെ 10ഓളം പ്രതികൾ സംഭവത്തിന്റെ പിന്നിലുണ്ടെന്നാണ് സൂചന. ചാർട്ടേഡ് അക്കൗണ്ടന്റിന് നഷ്ടമായ പണത്തിൽ 50 ലക്ഷം രൂപ മാറ്റപ്പെട്ട ഒരു അക്കൗണ്ടുമായി ബന്ധമുള്ളവരാണ് പിടിയിലായത്. 72 അക്കൗണ്ടുകളിലേക്കാണ് തട്ടിയെടുത്ത പണം മാറ്റിയിരുന്നത്. മുംബയ് കസ്റ്റംസിലെ ഉദ്യോഗസ്ഥനെന്ന വ്യാജേന തിരുവനന്തപുരത്തെ ചാർട്ടേഡ് അക്കൗണ്ടന്റിനെ ബന്ധപ്പെട്ടായിരുന്നു തട്ടിപ്പ്. അക്കൗണ്ടന്റിന്റെ ആധാർ കാർഡ് ഉൾപ്പെടെയുള്ള രേഖകൾ ഉപയോഗിച്ച് വിദേശത്തേക്ക് അയച്ച പാഴ്സലിൽ പാസ്‌പോർട്ടും മയക്കുമരുന്നുമുണ്ടെന്നും മുംബയ് കസ്റ്റംസ് ഓഫീസിൽ ഹാജരാകണമെന്നുമായിരുന്നു ഉദ്യോഗസ്ഥൻ ചമഞ്ഞയാൾ പറഞ്ഞത്.

സ്‌കൈപ്പുവഴി വീഡിയോ കാളിലെത്തിയ യൂണിഫോം ധരിച്ച തട്ടിപ്പുകാരൻ, സംഭവത്തെക്കുറിച്ച് വിശദീകരിക്കുകയും ചെയ്‌തു. ചാർട്ടേഡ് അക്കൗണ്ടന്റിന് കള്ളപ്പണ ഇടപാടുകളോ മയക്കുമരുന്ന് കടത്തോ ഇല്ലെന്ന് തെളിയിക്കാൻ അക്കൗണ്ടിലെ മുഴുവൻ പണവും റിസർവ് ബാങ്ക് അക്കൗണ്ടിലേക്ക് മാറ്റാൻ ആവശ്യപ്പെട്ടു. പരിശോധനയ്ക്ക് ശേഷം പണം അക്കൗണ്ടിലേക്ക് മടക്കി നൽകുമെന്നും അറിയിച്ചിരുന്നു. ഇതിനായി ആറ് അക്കൗണ്ട് നമ്പരുകളും നൽകി. ഇക്കാര്യങ്ങൾ വിശ്വസിച്ച ചാർട്ടേഡ് അക്കൗണ്ടന്റ് പണം അക്കൗണ്ടുകളിലേക്ക് നൽകുകയായിരുന്നു.

പ്രധാന സ്വകാര്യ ബാങ്കിന്റെ അക്കൗണ്ട് നമ്പരിലേക്കാണ് തട്ടിപ്പ് നടത്തിയ ആൾ പണം മാറ്റിയത്. വീണ്ടും പണം ആവശ്യപ്പെട്ടപ്പോഴാണ് തട്ടിപ്പാണെന്ന് മനസിലാക്കി അദ്ദേഹം പൊലീസിനെ അറിയിച്ചത്. ഇതിനിടെ തട്ടിപ്പുകാർ ഭൂരിഭാഗം പണവും മറ്റ് അക്കൗണ്ടുകളിലേക്ക് മാറ്റിയിരുന്നു. സിറ്റി പൊലീസ് വിവരം സൈബർ വിഭാഗത്തിന് കൈമാറിയതോടെ അവർ ഇടപെട്ട് 50 ലക്ഷത്തോളം രൂപ മറ്റ് അക്കൗണ്ടുകളിലേക്ക് പോകാതെ മരവിപ്പിക്കുകയായിരുന്നു.