വെള്ളനാട്: വള്ളനാട് ബ്ലോക്ക് പഞ്ചായത്തിൽ ഭരണ സമിതി അറിയാതെ നവകേരള സദസിന് സെക്രട്ടറി പണം നൽകിയതിൽ പ്രതിഷേധിച്ച് ബ്ലോക്ക് പഞ്ചായത്ത് സെക്രട്ടറിയെ യു.ഡി.എഫ് ഭരണസമിതി ഉപരോധിച്ചു. ഇന്നലെ രാവിലെ 10ഓടെ വെള്ളനാട് ബ്ലോക്ക് പഞ്ചായത്ത് സെക്രട്ടറി എസ്. ജീവനെയാണ് ബ്ലോക്ക് പഞ്ചായത്ത് പ്രസിഡന്റ് ഇന്ദുലേഖ, സ്റ്റാൻഡിംഗ് കമ്മിറ്റി ചെയർമാൻ കമൽരാജ്, വികസന ചെയർപേഴ്സൺ സരള ടീച്ചർ, അംഗങ്ങളായ മുഹമ്മദ് ഷാജി, ടി.സുനിൽകുമാർ, വിജയൻ ഫർസാന എന്നിവർ ചേർന്ന് ഓഫീസിലെ വൈദ്യുതി ബന്ധം വേർപെടുത്തിയ ശേഷം സെക്രട്ടറിയുടെ വാതിൽ പൂട്ടി തടഞ്ഞു വയ്ക്കുകയായിരുന്നു. ഇതിനിടെ സമീപത്തുള്ള വെള്ളനാട് ഗ്രാമ പഞ്ചായത്ത് പ്രസിഡന്റ്, വൈസ് പ്രസിഡന്റ് എന്നിവർ ഭരണസമിതിക്ക് പിൻതുണയുമായി ബ്ലോക്ക് പഞ്ചായത്ത് ഓഫീസിലെത്തിയത് പ്രതിപക്ഷവുമായി വാക്കേറ്റത്തിനിടയാക്കി. തുടർന്ന് പൊലീസ് ഇടപെട്ട് ഇവരെ പുറത്താക്കി. കാട്ടാക്കട ഡി.വൈ.എസ്.പി ഷിബു, ആര്യനാട് എസ്.ഐ. ഷീന എന്നിവരുടെ നേതൃത്വത്തിൽ ഉച്ചയ്ക്ക് 12ഓടെ ഭരണസമിതി അംഗങ്ങളെ അറസ്റ്റുചെയ്തു. കെ.എസ്.ഇ.ബി ഉദ്യോഗസ്ഥർ എത്തിയാണ് വൈദ്യുതി പുനഃസ്ഥാപിച്ചത്. അതേസമയം സർക്കാരിന്റെ ഉത്തരവിൻ പ്രകാരമാണ് നവ കേരള സദസിന് പണം നൽകിയതെന്നും തടഞ്ഞുവെച്ചതിൽ പരാതിയില്ലെന്നും ബ്ലോക്ക് പഞ്ചായത്ത് സെക്രട്ടറി അറിയിച്ചു.

കോൺഗ്രസ് അംഗങ്ങളെ അറസ്റ്റ് ചെയ്ത് നീക്കിയതിൽ പ്രതിഷേധിച്ച് യു.ഡി.എഫ് ബ്ലോക്ക് ജന പ്രതിനിധികൾ ആര്യനാട് പൊലീസ് സ്റ്റേഷന് മുന്നിൽ പ്രതിഷേധിച്ചു. പ്രതിഷേധ പരിപാടി അരുവിക്കര കോൺഗ്രസ് ബ്ലോക്ക് പ്രസിഡന്റ് വെള്ളനാട് ജ്യോതിഷ് കുമാർ ഉദ്ഘാടനം ചെയ്തു.