മണർകാട്: മദ്ധ്യവയസ്‌കയായ വീട്ടമ്മയെ കൊലപ്പെടുത്താൻ ശ്രമിച്ചയാൾ അറസ്റ്റിൽ. എറണാകുളം ചേരാനല്ലൂർ ഇടയക്കുന്നം കരിക്കത്തറ വീട്ടിൽ ഷാജുനെയാണ് (57) മണർകാട് പൊലീസ് അറസ്റ്റ് ചെയ്തത്. വടവാതൂരിലെ ആശുപത്രിയിലെത്തി ഇവിടെ ചികിത്സയിലിരുന്ന മദ്ധ്യവയസ്‌കയായ വീട്ടമ്മയെ കഴുത്തുഞെരിച്ച് കൊലപ്പെടുത്താൻ ശ്രമിക്കുകയായിരുന്നു.

വിധവയായ വീട്ടമ്മയുമായി മുൻപ് കുറച്ചുകാലം ഒരുമിച്ച് താമസിച്ചിരുന്ന സമയത്ത് ഇവർ തമ്മിൽ വഴക്കുണ്ടാവുകയും അന്ന് ഇവരെ കൊലപ്പെടുത്താൻ ശ്രമിച്ചതിന് ഇയാൾ ജയിലിലാവുകയും ചെയ്തിരുന്നു. തുടർന്ന്, ജാമ്യത്തിലിറങ്ങിയ ഇയാൾ വീട്ടമ്മ ചികിത്സയ്ക്കായി ആശുപത്രിയിൽ അഡ്മിറ്റാണെന്നറിഞ്ഞ് ഇവിടെയെത്തി വീട്ടമ്മയെ കഴുത്തുഞെരിച്ച് കൊലപ്പെടുത്താൻ ശ്രമിക്കുകയായിരുന്നു.

പരാതിയെ തുടർന്ന് മണർകാട് പൊലീസ് കേസെടുത്ത് ഇയാളെ പിടികൂടി. എസ്.എച്ച്.ഒ അനിൽ ജോർജ്, എസ്.ഐ കെ.ആർ സുരേഷ്, സി.പി.ഒമാരായ അനിൽകുമാർ, ശ്രീകുമാർ, പത്മകുമാർ, ജൂഡ് ജോസ്, സജീഷ്, പ്രവീൺ എന്നിവർ ചേർന്നാണ് അറസ്റ്റ് ചെയ്തത്. പ്രതിയെ റിമാൻഡ് ചെയ്തു.