കാഞ്ഞി​രപ്പള്ളി: യുവാവി​നെ ആ​ക്ര​മി​ച്ച മൂ​ന്നു​പേർ അ​റ​സ്റ്റിൽ. കാഞ്ഞിരപ്പള്ളി ആനിത്തോട്ടം നെല്ലിമല പുതുപ്പറ​മ്പിൽ ഫൈസൽ (അ​ണ്ട്രി- 28) കൂവപ്പള്ളി പൊടിമറ്റം പുത്തൻപുരയ്ക്കൽ അയ്യൂബ് (37), കാഞ്ഞിരപ്പള്ളി ബംഗ്ലാവ് പറ​മ്പ് അയ്യൂ​ബ് അൻസാരി (26) എന്നിവരെയാണ് കാഞ്ഞി​ര​പ്പള്ളി പൊലീസ് അറസ്റ്റ് ചെയ്തത്.

ഇവർ സംഘം ചേർന്ന് മണ്ണാറക്കയം പുത്തൻ റോഡ് കോളനി ഭാഗത്തുള്ള യുവാവിന്റെ വീട്ടിൽ അതിക്രമിച്ചു കയറി യുവാവിനെ ആക്രമിച്ചു കൊലപ്പെടുത്താൻ ശ്രമിക്കുകയായിരുന്നു. യുവാവിന്റെ അയൽവാസിയായ റോഡ് കോൺട്രാ​ക്ടറും യുവാവും വഴിയിൽ സംസാരിച്ചുകൊണ്ടിരിക്കെ കോൺക്രീറ്റ് ചെയ്തു ഉറയ്ക്കാത്ത റോഡിലേക്ക് ബൈക്കുമായി വന്ന ഫൈസലിനെ ഇവർ ചോദ്യം ചെയ്തിരുന്നു.

തുടർന്ന് സുഹൃത്തുക്കളുമായി ഫൈസൽ ഓട്ടോറി​ക്ഷ​യിലെത്തി യുവാവി​നെ അ​സ​ഭ്യം​പ​റയു​കയും വടി, കല്ല് എന്നിവ ഉപയോഗിച്ച് ആക്രമിക്കുകയുമായിരു​ന്നു. യുവാവിന്റെ സുഹൃത്തുക്കളെയും ഇവർ സംഘം ചേർന്ന് മർ​ദ്ദിച്ചു. പരാതിയെ തുടർന്ന് കാഞ്ഞിര​പ്പ​ള്ളി പൊലീസ് കേ​സെ​ടു​ത്ത് ന​ട​ത്തി​യ തി​ര​ച്ചി​ലിൽ മൂന്നുപേരെ പിടി​കൂ​ടി.

എസ്.എച്ച്.ഒ നിർമ്മൽ ബോസിന്റെ നേതൃത്വത്തിലാണ് അറസ്റ്റ്. ഫൈസൽ കാഞ്ഞിരപ്പള്ളി സ്റ്റേഷനിലെ ആന്റി സോഷ്യൽ ലിസ്റ്റിൽ ഉൾപ്പെട്ട ആളാണ്. കോടതിയിൽ ഹാജരാക്കിയ മൂവരെയും റിമാൻഡ് ചെയ്തു. മറ്റു പ്രതികൾക്കായി തിരച്ചിൽ ശക്തമാക്കി.