തൃപ്രയാർ: ഏകാദശിയോടനുബന്ധിച്ച് നാട്ടിക പഞ്ചായത്തിന്റെയും വാടാനപ്പിള്ളി സാമൂഹിക ആരോഗ്യ കേന്ദ്രത്തിന്റെയും നേതൃത്വത്തിൽ പരിശോധന നടത്തി. ഹോട്ടലുകൾ, ബേക്കറികൾ, ടീ സ്റ്റാളുകൾ, ഫ്രൂട്ട് സ്റ്റാളുകൾ, ജ്യൂസ് കടകൾ, ഐസ്‌ക്രീം കടകൾ, താത്കാലിക കച്ചവട സ്ഥാപനങ്ങൾ തുടങ്ങിയ സ്ഥാപനങ്ങളിലാണ് പരിശോധന നടന്നത്. നിരോധിത പ്ലാസ്റ്റിക് ഉത്പ്പന്നങ്ങളായ ക്യാരി ബാഗുകൾ, ഗ്ലാസ്, പ്ലേറ്റ്, സ്‌ട്രോ എന്നിവ പിടിച്ചെടുക്കുകയും പിഴയീടാക്കുകയും ചെയ്തു. പഴകിയതും ഉറുമ്പരിച്ചതുമായ ഈന്തപ്പഴം, മധുര സേവ എന്നിവ താത്കാലിക സ്റ്റാളുകളിൽ നിന്നും പിടിച്ചെടുത്ത് നശിപ്പിച്ചു.
ബജി സ്റ്റാളുകളിൽ നിന്നും പഴകിയ കോളിഫ്‌ളവർ പിടിച്ചെടുത്ത് നശിപ്പിച്ചു. വൃത്തിഹീനമായ സാഹചര്യത്തിൽ പ്രവർത്തിച്ച ബജി സ്റ്റോർ അടപ്പിച്ചു. ഹെൽത്ത് കാർഡ്, ലൈസൻസ് എന്നിവ എടുക്കാത്ത സ്ഥാപനങ്ങൾക്ക് പിഴ നോട്ടീസ് നൽകി. പരിശോധനയ്ക്ക് വാടാനപ്പിള്ളി സാമൂഹിക ആരോഗ്യ കേന്ദ്രത്തിലെ ഹെൽത്ത് സൂപ്പർവൈസർ കെ. ഗോപകുമാർ, നാട്ടിക കുടുംബാരോഗ്യ കേന്ദ്രത്തിലെ ഹെൽത്ത് ഇൻസ്‌പെക്ടർ ടി.പി. ഹനീഷ് കുമാർ, വലപ്പാട് സാമൂഹിക ആരോഗ്യ കേന്ദ്രത്തിലെ ഹെൽത്ത് ഇൻസ്‌പെക്ടർ വി.എസ്. രമേശ്, ഏങ്ങണ്ടിയൂർ കുടുംബാരോഗ്യ കേന്ദ്രത്തിലെ ഹെൽത്ത് ഇൻസ്‌പെക്ടർ എസ്.എൽ. ദീപ, നാട്ടിക പഞ്ചായത്ത് ഹെൽത്ത് ഇൻസ്‌പെക്ടർ കെ.ആർ. റീജ, വിവിധ ആരോഗ്യ കേന്ദ്രത്തിലെ ജൂനിയർ ഹെൽത്ത് ഇൻസ്‌പെക്ടർമാരായ സി.ടി. സുജിത്ത്, കെ.എ. ജെതിൻ, പി.കെ. ഹാരിസ്, സി.പി. നിഷൻ, ടി.ജെ. പ്രിൻസ്, അനീഷ പ്രസാദ്, പി.എ. സജീന, അഞ്ജു സുരേന്ദ്രൻ, ജിജി ബിജോസ്, നാട്ടിക പഞ്ചായത്ത് ജീവനക്കാരായ കെ.എം. ഇന്ദു, സി.സി. ഷൈനി എന്നിവർ നേതൃത്വം നൽകി.