തിരുവനന്തപുരം: മലയാളികളുടെ പ്രിയ ഫുട്ബാൾ താരം ഐ.എം.വിജയൻ ഉൾപ്പെടെയുള്ള മുൻകാല ഫുട്‌ബാൾ ഹീറോസ് വീണ്ടും മത്സരത്തിനിറങ്ങുന്നു. പ്രസ് ക്ലബ് സംഘടിപ്പിക്കുന്ന കിംസ് ഹെൽത്ത് ട്രോഫി ഫുട്‌ബാൾ ടൂർണമെന്റിനോട് അനുബന്ധിച്ചാണ് മുൻ ഇന്ത്യൻ താരങ്ങളും സന്തോഷ് ട്രോഫി താരങ്ങളും ഉൾപ്പെടുന്ന ഐ.എം. വിജയൻ ഇലവനും ജോപ്പോൾ അഞ്ചേരി ഇലവനും തമ്മിൽ ചന്ദ്രശേഖരൻനായർ സ്റ്റേഡിയത്തിൽ പോരാട്ടത്തിനിറങ്ങുന്നത്.

19ന് വൈകിട്ട് 4.30ന് നടക്കുന്ന പ്രദർശന മത്സരത്തിൽ ഐ.എം.വിജയൻ, ജോപ്പോൾ അഞ്ചേരി, യു.ഷറഫലി, ജിജു ജേക്കബ്, കുരികേശ് മാത്യു, മാത്യു വർഗീസ്, പി.പി.തോബിയാസ്, കെ.ടി.ചാക്കോ, ശ്രീഹർഷൻ, അലക്സ് എബ്രഹാം, അപ്പുക്കുട്ടൻ, വി.പി.ഷാജി, എം.സുരേഷ്, ആസിഫ് സഹീർ, അബ്ദുൾ റഷീദ്, ഗണേഷ്, ഇഗ്‌നേഷ്യസ്, ജോബി, സുരേഷ് കുമാർ, എബിൻ റോസ് എന്നിവർ കളിക്കളത്തിലിറങ്ങുമെന്ന് പ്രസ് ക്ലബ് പ്രസിഡന്റ് എം.രാധാകൃഷ്ണനും സെക്രട്ടറി കെ.എൻ.സാനുവും അറിയിച്ചു.
മാദ്ധ്യമപ്രവർത്തകർക്കായി നടത്തുന്ന കിംസ് ഹെൽത്ത് ട്രോഫി ഫുട്‌ബാൾ ടൂർണമെന്റിന്റെ കിക്കോഫ് 16ന് വൈകിട്ട് നാലിന് നടക്കും. ഉദ്ഘാടന,സമാപന സമ്മേളനങ്ങളിലും മത്സരങ്ങളിൽ താരങ്ങളെ പരിചയപ്പെടുന്നതിനും മുഖ്യാതിഥികളായി കേന്ദ്രമന്ത്രി വി.മുരളീധരൻ, മുൻ മന്ത്രിമാരായ എം.വിജയകുമാർ, എം.എം. ഹസ്സൻ, മുൻ എം.പി. പന്ന്യൻ രവീന്ദ്രൻ, കിംസ് ഹെൽത്ത് ചെയർമാൻ ഡോ. എം.ഐ. സഹദുള്ള, ഡി.ജി.പി ഷേക്ക് ദർവേഷ് സാഹിബ്, മുൻ ഡി.ജി.പിമാരായ ഋഷിരാജ് സിംഗ്, ആനന്ദകൃഷ്ണൻ, എ.ഡി.ജി.പി യോഗേഷ് ഗുപ്ത, വിഴിഞ്ഞം സീപോർട്ട് സി.എം.ഡി ദിവ്യ എസ്.അയ്യർ, കിംസ് ഹെൽത്ത് സി.ഇ.ഒ രശ്‌മി ആയിഷ എന്നിവർ പങ്കെടുക്കും.