കിളിമാനൂർ: ക്രിസ്മസിന് മധുരം പകരാൻ കേക്ക് വിപണി സജീവമായി. ബേക്കറികളെല്ലാം കേക്ക് ഉണ്ടാക്കുന്ന തിരക്കിലാണ്. ഇത്തവണ ഡ്രീം കേക്കാണ് താരം. ചെറിയും ചോക്ലേറ്റ് പൂക്കളുമായി ബേക്കറിയിൽ വിവിധ വർണങ്ങളിൽ കേക്കുകൾ തിളങ്ങി നിൽക്കുകയാണ്.ഐസിംഗ് കേക്ക്,കോഫീ ക്രഞ്ച് കേക്ക്,ചോക്ലേറ്റ്,ക്രീം,ചെറി,ബനാന,എഗ്ലെസ്, മാർബിൾ,ഫാൻസി ബട്ടർ,കാരറ്റ്,ഡേറ്റ്,റിച്ച് ഫ്രൂട്ട് തുടങ്ങി വിവിധതരത്തിലുള്ള കേക്കുകൾ വിപണിയിലുണ്ട്.എങ്കിലും ക്രിസ്മസ് കേക്കെന്നാൽ പ്ലം കേക്കാണ്.ഉണക്കമുന്തിരിയും കശുഅണ്ടിയും നാളുകൾക്ക് മുമ്പേ പഴച്ചാറുകളിൽ മുക്കിയിട്ട് ഉണ്ടാക്കുന്ന പ്ലം കേക്കിന് ആരാധകർ ഏറെയാണ്.ഐസിംഗ് ചെയ്ത പ്ലം കേക്കുകൾക്കും ഓർഡർ ലഭിക്കാറുണ്ടെന്ന് വ്യാപാരികൾ പറയുന്നു.

ഷുഗർ ഫ്രീ കേക്കുകളും

ഓർഡർ സ്വീകരിച്ചതിനുശേഷം മണിക്കൂറുകൾ കൊണ്ട് കേക്കുണ്ടാക്കി നൽകുന്ന ബേക്കറികളുമുണ്ട്. പ്രമേഹ രോഗികൾക്കായി ഷുഗർ ഫ്രീ കേക്കുകളും ഇടംപിടിച്ചിട്ടുണ്ട്. കുടുംബശ്രീ ഉൾപ്പെടെയുള്ള വിവിധ ചെറുകിട യൂണിറ്റുകൾ കേക്ക് നിർമ്മാണവും വിപണനവും നടത്തുന്നുണ്ട്.ഹോം മെയ്ഡ് കേക്കുകൾക്കും ആവശ്യക്കാർ ഏറെയാണ്

വില

പ്ലം കേക്ക് : 380 - 1300 രൂപ

ടീ കേക്ക്: 380

കാരറ്റ് ഡേറ്റ് : 400

മാർബിൾ : 400

ഡ്രീം കേക്ക് : 500

പൈനാപ്പിൾ : 380

ഗീ കേക്ക് : 350