പാറശാല: പാറശാല ബ്ലോക്ക് പഞ്ചായത്ത് നടപ്പിലാക്കുന്ന രോഗമില്ലാത്ത ഗ്രാമം പദ്ധതിയുടെ മൂന്നാം ഘട്ടത്തിന് ചെങ്കൽ പഞ്ചായത്തിൽ തുടക്കമായി. ബ്ലോക്ക് പഞ്ചായത്തിൽ ഉൾപ്പെടുന്ന ആറ് പഞ്ചായത്തുകളുടെ സഹകരണത്തോടെയാണ് പദ്ധതി നടപ്പിലാക്കുന്നത്. തിരുവനന്തപുരം ആർ.സി.സി, പാറശാല താലൂക്ക് ആശുപത്രി, പൂവാർ കമ്മ്യൂണിറ്റി ഹെൽത്ത് സെന്റർ, ശ്രീ മൂകാംബിക മെഡിക്കൽ കോളേജ്, പാറശാല സരസ്വതി ആശുപത്രി എന്നിവയുടെ മേൽനോട്ടത്തിലാണ് പരിശോധനകളും ചികിത്സയും നടക്കുന്നത്. മൂന്നാം ഘട്ടത്തിന്റെ ഭാഗമായ ചെങ്കൽ പഞ്ചായത്തിലെ ഉദ്‌ഘാടനം പാറശാല ബ്ലോക്ക് പഞ്ചായത്ത് പ്രസിഡന്റ് എസ്‌.കെ. ബെൻഡാർവിൻ നിർവഹിച്ചു. കുരുമ്പൽ സി.എസ്.ഐ ചർച്ച് പാരിഷ് ഹാളിൽ നടന്ന ചടങ്ങിൽ ബ്ലോക്ക് പഞ്ചായത്ത് അംഗം എം.ഷിനി അദ്ധ്യക്ഷത വഹിച്ചു. ചെങ്കൽ ഗ്രാമപഞ്ചായത്ത് വൈസ് പ്രസിഡന്റ് കെ. അജിത്കുമാർ മുഖ്യാതിഥിയായി. പൂവാർ സി.എച്ച്.സി മെഡിക്കൽ ഓഫീസർ ഡോ. മിനി റിപ്പോർട്ട് അവതരിപ്പിച്ചു. ഇടവക വികാരി ബോബസ് ടൈറ്റസ്, ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്. ആര്യദേവൻ, ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജെ.ജോജി, ബ്ലോക്ക് മെമ്പർ രാഹിൽ ആർ.നാഥ്‌, എച്ച്. എസ്.ശ്രീതിലകരാജ് എന്നിവർ സംസാരിച്ചു.