വർക്കല: നാരായണഗുരുകുല ശതാബ്ദി ആഘോഷത്തിന്റെ സമാപനവും 73-ാമത് ഗുരുകുല കൺവെൻഷനും ഗുരുനിത്യചൈതന്യയതിയുടെ ജന്മശതാബ്ദിആഘോഷവും സംയുക്തമായി 23ന് വർക്കല നാരായണഗുരുകുലത്തിൽ ആരംഭിക്കും. അമേരിക്കയിലെ ഗുരുകുലശിഷ്യനും ചിത്രകാരനുമായ ആൻഡ്രുലാർക്കിൻ ആത്മോപദേശ ശതകത്തിലെ ശ്ലോകങ്ങളുടെ സാരം ധ്യാനത്തിൽ ദർശിച്ച് രചിച്ച നൂറ് ചിത്രങ്ങളുടെ പ്രദർശനവും ഗുരുകുല ശിഷ്യൻ പ്രമോദ് കൂരമ്പാലയുടെ ചിത്രപ്രദർശനവും ഇതോടനുബന്ധിച്ച് നടക്കും. നാരായണഗുരുകുലത്തിലെ ഗൃഹസ്ഥശിഷ്യരുടെ വിശാലകൂട്ടായ്മയായ പീതാംബരസൗഹൃദത്തിലെ അംഗങ്ങളും ഒത്തുചേരും.

23ന് രാവിലെ 9ന് ഡോ.പീറ്റർമൊറൈസ് ഗുരുനാരായണഗിരിയിലെ ബ്രഹ്മവിദ്യാമന്ദിരാങ്കണത്തിൽ പതാക ഉയർത്തുന്നതോടെ പരിപാടികൾ ആരംഭിക്കും. 10.40ന് മുൻ ചീഫ് സെക്രട്ടറി വി.പി.ജോയി ഉദ്ഘാടനം നിർവ്വഹിക്കും. നാരായണഗുരുകുലാദ്ധ്യക്ഷൻ ഗുരുമുനിനാരായണപ്രസാദ് അദ്ധ്യക്ഷത വഹിക്കും. ശ്രീനാരായണ ധർമ്മസംഘം ട്രസ്റ്റ് ബോർഡംഗം സ്വാമി ഋതംഭരാനന്ദ, അമേരിക്കയിലെ ബെയിൻബ്രിഡ്ജ് ഗുരുകുലത്തിലെ നാൻസി യീൽഡിംഗ് എമ്മാവർക്കർ (ആസ്ട്രേലിയ) എന്നിവർ സംസാരിക്കും. വൈകിട്ട് 3.30ന് ഗുരുകുല ശതാബ്ദി സമാപന സമ്മേളനം സ്വാമി വ്യാസപ്രസാദ് ഉദ്ഘാടനം ചെയ്യും. സ്വാമി തന്മയ, സ്വാമി വിദ്യാധാരാജ, സാധുഗോപിദാസ്, സ്വാമി ശാന്താനന്ദതീർത്ഥ, സ്വാമി തത്വതീർത്ഥ, സ്വാമി ഗോപിചൈതന്യ, സ്വാമി മന്ത്റചൈതന്യ, സ്വാമിനി ചൈതന്യമയി, സ്വാമിനി ജ്യോതിർമയിഭാരതി തുടങ്ങിയവർ സംസാരിക്കും. തുടർന്ന് 29 വരെ വിവിധ വിഷയങ്ങളെ ആസ്പദമാക്കി സെമിനാറുകൾ നടക്കും. എല്ലാദിവസവും രാവിലെ ഹോമം, ഉപനിഷത്ത് പാരായണം, പ്രവചനം എന്നിവയോടെയാണ് കൺവെൻഷൻ പരിപാടികൾ ആരംഭിക്കുന്നത്.