ആരാധകർക്കൊപ്പം ഒരുദിവസം നീക്കിവച്ച് മലയാളത്തിന്റെ സൂപ്പർതാരം മോഹൻലാൽ . ഒാൾ കേരള മോഹൻലാൽ ഫാൻസ് ആൻഡ് കൾച്ചറൽ വെൽഫയർ അസോസിയേഷന്റെ 25-ാമത് വാർഷിക സമ്മേളനത്തിലാണ് ആരാധകർക്കായി ഒരുദിവസം ചിലവിടാൻ മോഹൻലാൽ തീരുമാനിച്ചത്. മോഹൻലാലിനൊപ്പം ഫോട്ടോ എടുക്കാനുള്ള സൗകര്യം പരിപാടിയുടെ ഭാഗമായി ഒരുക്കിയിരുന്നു. അയ്യായിരത്തിന് മുകളിൽ ആരാധകർക്കൊപ്പം ഫോട്ടോ എടുക്കുകയും ചെയ്തു. നെടുമ്പാശേരി സിയാൽ കൺവെൻഷൻ സെന്ററിൽ നടന്ന പരിപാടിയിൽ വിവിധ ജില്ലകളിൽ നിന്ന് ആറായിരത്തോളം ആരാധകരാണ് മോഹൻലാലിനെ കാണാൻ എത്തിയത്.

ആരാധകരെ സംബോധന ചെയ്ത് സംസാരിച്ച മോഹൻലാൽ എത്താൻ വൈകിയതിന് ക്ഷമാപണത്തോടെയാണ് പ്രസംഗിച്ചു തുടങ്ങിയത്. മോഹൻലാൽ ഫാൻസ് അസോസിയേഷന്റെ പുതിയ ഭാരവാഹികളെ താരം ചടങ്ങിൽ പരിചയപ്പെടുത്തി. ആരാധക സംഗത്തിനൊപ്പം പത്രസമ്മേളനവും നടന്നു.ആന്റണി പെരുമ്പാവൂരിനൊപ്പമാണ് മോഹൻലാൽ എത്തിയത്.