വർക്കല :നവകേരള സദസ് ഇന്ന് തിരുവനന്തപുരം ജില്ലയിൽ പ്രവേശിക്കും.വൈകിട്ട് 5ന് ശിവഗിരി മഠം ഓഡിറ്റോറിയത്തിലാണ് ജില്ലയിലെ ആദ്യപരിപാടി. മുഖ്യമന്ത്രിയും മന്ത്രിമാരും പൊതുജനങ്ങളുമായി നേരിട്ട് സംവദിക്കും. പൊതുജനങ്ങൾക്ക് വൈകിട്ട് 3 മണി മുതൽ നിവേദനങ്ങൾ സമർപ്പിക്കുന്നിനായി സൗകര്യം ഒരുക്കിയിട്ടുണ്ട്.ഒാഡിറ്റോറിയത്തിനു സമീപം ഭിന്നശേഷിക്കാർക്ക് വേണ്ടി ഒരു കൗണ്ടറും വയോജനങ്ങൾക്ക് വേണ്ടി രണ്ടു കൗണ്ടറുകളും സ്ത്രീകൾക്കുവേണ്ടി എട്ട് കൗണ്ടറുകൾ ഉൾപ്പെടെ ആകെ 23 കൗണ്ടറുകൾ സജ്ജീകരിച്ചിട്ടുണ്ട്. നിവേദനങ്ങൾ എഴുതി തയ്യാറാക്കാൻ കഴിയാത്തവർക്ക് ഹെൽപ്പ് ഡെസ്കിന്റെ സഹായത്തോടെ നിവേദനങ്ങൾ സമർപ്പിക്കുന്നതിനുള്ള സംവിധാനവും ഒരുക്കിയിട്ടുണ്ട്. മണ്ഡലത്തിലെ വിവിധ വകുപ്പുകളിലെ ഉദ്യോഗസ്ഥരെ കൗണ്ടറുകളുടെ പ്രവർത്തനങ്ങൾക്കായും പൊതുജനങ്ങളെ സഹായിക്കുന്നതിനുമായി നിയോഗിച്ചിട്ടുണ്ട്. ഉദ്ഘാടന വേദിയിൽ വൈകിട്ട് 4 മുതൽ ചലച്ചിത്ര പിന്നണി ഗായകൻ അതുൽ നറുകര നയിക്കുന്ന സംഗീതപരിപാടി നടക്കും.

ഗതാഗത ക്രമീകരണം

മണ്ഡലത്തിലെ വിവിധയിടങ്ങളിൽ നിന്നും എത്തിച്ചേരുന്ന വാഹനങ്ങൾ മട്ട് ജംഗ്ഷൻ വഴി ശിവഗിരിയിൽ പൊതുജനങ്ങളെ വേദിയുടെ മുൻവശത്ത് ഇറക്കിയശേഷം വാഹനങ്ങൾ ശിവഗിരി എസ്.എൻ കോളേജിലും ശിവഗിരി സകൂളുകളിലുമായി സജ്ജീകരിച്ചിട്ടുള്ള പാർക്കിംഗ് കേന്ദ്രങ്ങളിൽ പാർക്ക് ചെയ്യേണ്ടതാണ്. പൊതുജനങ്ങൾക്ക് പ്രസ്തുത വേദിയിൽ എത്തിച്ചേരുന്നതിന് ആവശ്യമായ വാഹനങ്ങളും സജ്ജീകരിച്ചിട്ടുണ്ട്. പാലച്ചിറ ജംഗ്ഷനിൽ നിന്നും ഗുരുകുലം റോഡിലേക്ക് വാഹനങ്ങൾ കടന്ന് പോകുന്നതിന് നിയന്ത്രണം ഉണ്ടായിരിക്കും.