തിരുവനന്തപുരം: പിണറായിയുടെ പാദസേവ ചെയ്യുന്ന പൊലീസുകാർക്ക് അർഹിക്കുന്ന കൂലി കോൺഗ്രസ് നൽകുമെന്ന് കെ.പി.സി.സി പ്രസിഡന്റ് കെ.സുധാകരൻ എം.പി പ്രസ്താവിച്ചു. കെ.എസ്.യു പ്രവർത്തകർക്കുനേരെ പൊലീസ് നടത്തിയത് നരനായാട്ടാണ്. അക്രമവാസനയുള്ള എസ്.എഫ്.ഐക്കാരെ ഭാവിയുടെ വാഗ്ദാനമായി കാണുന്ന മുഖ്യമന്ത്രിയാണ് കെ.എസ്.യുക്കാരെ മൃഗീയമായി തല്ലിച്ചതയ്ക്കാൻ പൊലീസിന് നിർദ്ദേശം നൽകിയത്.

മാർച്ച് ഉദ്ഘാടനം ചെയ്ത മാത്യുകുഴൽ നാടനെ ജനപ്രതിനിധിയെന്ന പരിഗണന പോലും നൽകാതെ പൊലീസ് മർദ്ദിച്ചു. കെ.എസ്.യു അദ്ധ്യക്ഷൻ അലോഷ്യസ് സേവ്യർ ഉൾപ്പെടെ നിരവധി പ്രവർത്തകർക്ക് പരിക്കേറ്റു. കലാപാഹ്വാനം നടത്തിയ മുഖ്യമന്ത്രിക്കെതിരെ കേസെടുക്കാതെ കുട്ടികളെ സംരക്ഷിക്കാൻ തെരുവിലിറങ്ങിയ പ്രതിപക്ഷ നേതാവിനെതിരെ കേസെടുത്തത് വിരോധാഭാസമാണ്. കോൺഗ്രസ് കണക്കു ചോദിക്കാൻ ഇറങ്ങുമ്പോഴും പൊലീസ് ഇതേ വീര്യം കാട്ടണമെന്നും സുധാകരൻ പറഞ്ഞു.