കിടങ്ങൂർ: മുക്കുപണ്ടം പണയംവച്ച് പണം തട്ടിയ കേസിൽ രണ്ടു പേർ അറസ്റ്റിൽ. പീരുമേട് നാരകംപുഴ ചന്തക്കടവ് പുളിക്കൽ പീടികയിൽ മുഹമ്മദ് (23), ഈരാറ്റുപേട്ട നടക്കൽ വെള്ളാപ്പള്ളിൽ കബീർ (52) എന്നിവരെയാണ് കിടങ്ങൂർ പൊലീസ് അറസ്റ്റ് ചെയ്തത്. കിടങ്ങൂർ സ്വദേശിയായ യുവാവ് ഓഗസ്റ്റ് 8 ന് കിടങ്ങൂരിൽ പ്രവർത്തിക്കുന്ന സ്വകാര്യ പണമിടപാട് സ്ഥാപനത്തിൽ സ്വർണം ആണെന്ന വ്യാജേന മുക്കുപണ്ടമായ മാല പണയം വെച്ച് 90,000 രൂപ തട്ടിയെടുക്കുകയായിരുന്നു. പരാതിയിൽ കിടങ്ങൂർ പൊലീസ് കേസെടുത്തു. തുടർന്ന് നടത്തിയ അന്വേഷണത്തിൽ ഇയാളെ പിടികൂടി. യുവാവിനെ ചോദ്യം ചെയ്തതിൽ നിന്നും യുവാവിന് മുക്കുപണ്ടം പണയം വയ്ക്കാൻ നൽകിയത് മുഹമ്മദും, കബീറും ആണെന്ന് കണ്ടെത്തി. തുടർന്ന് നടത്തിയ തിരച്ചിലിലാണ് ഇരുവരെയും പിടികൂടിയത്. മുഹമ്മദിനെ മധുരയിൽ നിന്നുമാണ് പിടികൂടിയത്. ഇയാൾക്ക് തൊടുപുഴ സ്റ്റേഷനിൽ സമാനമായ കേസ് നിലവിലുണ്ട് . കിടങ്ങൂർ സ്റ്റേഷൻ എസ്.എച്ച്.ഒ ടി.എസ് റെനീഷ്, എസ്.ഐ കുര്യൻ മാത്യു, സി.പി.ഒമാരായ ജോഷി മാത്യു, അഷറഫ് ഹമീദ്, ജോസ്ചാന്തർ എന്നിവർ ചേർന്നാണ് ഇവരെ അറസ്റ്റ് ചെയ്തത്. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു.