തിരുവനന്തപുരം: സംസ്ഥാന സർക്കാരിന്റെ കീഴിലുള്ള ഗവേഷണസ്ഥാപനമായ നാഷണൽ കയർ റിസർച്ച് ആൻഡ് മാനേജ്‌മെന്റ് ഇൻസ്റ്റിറ്റ്യൂട്ട് (എൻ.സി.ആർ.എം.ഐ) വികസിപ്പിച്ചെടുത്ത അഞ്ച് ഉത്പന്നങ്ങളുടെ ലോഞ്ചിങ്ങും ഉദ്ഘാടനവും മന്ത്രി പി. രാജീവ് നിർവഹിക്കും.

ജനുവരി 3ന് വൈകിട്ട് 4ന് എൻ.സി.ആർ.എം.ഐ ക്യാമ്പസിൽ നടക്കുന്ന ചടങ്ങിൽ വി.കെ. പ്രശാന്ത് എം.എൽ.എ അദ്ധ്യക്ഷത വഹിക്കും. കടകംപള്ളി സുരേന്ദ്രൻ എം.എൽ.എ മുഖ്യപ്രഭാഷണം നടത്തും. പ്രമുഖ ഗവേഷകർ, സർക്കാർ പ്രതിനിധികൾ, കയറ്റുമതിക്കാർ തുടങ്ങിയവർ പങ്കെടുക്കും. റോഡ് നിർമ്മാണത്തിന് വികസിപ്പിച്ചെടുത്ത കയർ ഡിവൈഡർ, കൊക്കോഓറ എന്ന എയർഫ്രഷ്നർ, കയറിന്റെ റണ്ണേജ് ഒരു മിനിട്ടിനുള്ളിൽ നിർണയിക്കുവാൻ സാധിക്കുന്ന ഡിജിറ്റൽ കയർ റണ്ണേജ് മീറ്റർ, ജൈവ നടീൽ മിശ്രിതമായ കൊക്കോനർച്ചർ, കയർപിത്തും ടെൻഡർ കോക്കനട്ടിന്റെ പൊടിച്ച മിശ്രിതവും ഉപയോഗിച്ച് കമ്പോസ്റ്റിംഗ് പ്രക്രിയ വേഗത്തിലാക്കാനുള്ള ട്രൈക്കോപിത്ത് പ്രോ എന്നീ ഉത്പന്നങ്ങളാണ് പുറത്തിറക്കുന്നത്.